12月

12月1日 (星期日)

由於今朝 8 點要返到中心幫手做義工，所以今朝 7 點起身，今朝首先到深井攪一個起行山徑釘路牌既義工，我同 terri 負責 set point，而參加者就負責起 d point 釘路牌，睇黎佢地釘得好開心，今次同行既重有另一間中心既參加者，主要係老人家，不過佢地雖然一把年紀，不過行起上黎重快過 d 後生仔，真係老當益壯，不過今次條路相當短，大約行半個鐘就行完，之後起度玩左一陣集體遊戲，班參加者就跟 eva 搭車返去，而我、terri 同 jennifer 就留起度做第二樣野，將 d 路牌拆返走，諗返都覺幾無聊，又要釘又要拎返走，枉 d 家庭重咁努力釘到佢地咁靚，俾佢地知道實覺得好失望。之後落返去深井食 lunch，去左裕記燒鵝度食，叫左 3 碟飯，不過好鬼大碟，食剩好多，價錢一般啦，味道又唔差，遲 d 同人做生日可以叫佢地黎試下。下午就入屯門醫院同班智障人士攪活動，由於佢地係嚴重弱智既病人，其實都唔可以期望佢地可以做到乜野，唯有叫佢地 d 家人出黎玩，好彩都叫勉勉強強完成左，最攪笑都係要我地上台唱歌，唱左首小丸子版既報佳音同埋 we wish u a merry christmas，重有一班係用手語表演唱歌既義工，佢地下星期都會起新都會廣場表演，睇黎到時我又會見到佢地。完左個活動之後就出旺角同羊肉重有 wendy 行街，今日羊肉買左好多衫，重有件係有羊公仔既冷外套，佢睇到就已經好開心，最後當然有買，夜 d 就去左間越法式餐廳食野，呢間餐廳既食物名稱好特別，個個名都加到好長，剩係睇個名其實都未必知佢係乜，今次一人叫左一樣，睇真其實佢 d 食物名都用左好多修飾詞，一般餐廳都叫到，不過味道都唔錯，可以再黎試下。食飽佢地話想睇數碼相機，於是就繼續行旺角，d 數碼相機真係出得快，一排冇行又出左幾部新款，見順路就行埋信和同埋潮流特區先走，可能差唔多 10 點既關係，都唔算太多人，行得好舒服，之後就搭車返去，計計埋埋今日出左 15 個鐘頭街，隻腳有 d 痺添。

估下聖誕老人係邊個扮

12月2日 (星期一)

今日竟然俾我執到寶，哈.....真開心。起網上面成日見到 d 好得意既圖，以後我都會分享俾大家睇先。

12月3日 (星期二)

今晚收到星期日做 mc 既司儀稿，成 6 張紙，今次有好多表演團體同埋嘉賓會出席，而且又起廣場入面舉行，到時一定會好多觀眾，好彩睇真 d 份稿其實都好多係要重覆講既野，等別係 d 嘉賓，今次拍擋係 vianna，相信以佢既經驗應該會冇乜問題。

12月4日 (星期三)

今晚出黎同呀 yawn 補祝生日，佢原本係 12 月 1 號生日，不過佢果日病左所以冇做到生日，今晚同佢補返去，左旺角幸福樓食飯，知道佢打邊爐幾出名，其實佢地 d 小菜都唔差，今次一共叫左 8 樣小菜，都幾好味，碟碟都同佢清晒咁滯，今次我同 kc 夾錢送左個龜仔膠紙座俾佢，fanny 佢就送左個會震既龜公仔，幸福樓最特別既地方就係出壽包果陣竟然會有生日歌奏起，我地聽到都好出奇，以為另一邊又攪生日會，不過睇真 d 又唔係，應該都係我地既，真係笑死。之後呀健話想飲野，就帶左我地去兆萬一間 pub 度，間 pub 個環境幾好，坐起度傾偈 0岩晒，又唔多人食煙，諗返都應該有成年冇落過 pub 飲野，今次飲左杯超低酒精成分既野，但都有少少面紅，我 d 酒量真係唔掂，傾傾下咁又 11 點幾就走，不過旺角 d 舖頭重未閂，連百老匯都開到 11 點幾，旺角真係名符其實。

12月5日 (星期四)

唔知隻眼做乜成日起度眼眉跳，重係右眼，聽講係左吉右兇，唔知遲 d 會發生乜事。

12月6日 (星期五)

今晚係清遠交流團第一次既工作坊，睇返今次參加者 15 人，有 13 個都係識既，睇黎今次都係自己人玩晒，今晚開會都係分組，講返自己組會負責既項目，睇黎都冇乜大問題，話晒大家都識少左好多麻煩，睇黎呢 4 日旅程會好開心。

12月7日 (星期六)

今晚起中心同 vlenna 夾返聽日做司儀既稿，佢話自己其實未做過司儀，重緊張過我，不過同佢夾過又發覺問題唔大，而且起新都會廣場咁大既地方，都唔怕望住成班朋友而怕醜，希望順順利利。到 10 點果陣原本 eva 有個夜行活動，不過因為呢晚天氣唔穩定而取消，而肥健同呀榮呢班義工就返晒黎中心，佢地見行唔成山就決定去唱通宵 k，最衰我聽日要早起，唔係我都會跟埋去。

12月8日 (星期日)

今日起新都會廣場做一個傷健義工活動既司儀，天文台果然係準，尋晚重有 23 度，今朝起身得返 18 度，天氣又壞不斷咁落微雨，由於個活動起露天舉行，所以都幾驚天氣惡劣而取消，份司儀稿臨時有 d 野要改，不過變動唔大，應該 ok，今次除左我同 velnna 重有兩位手語司儀呀君同呀輝，同佢地夾過都覺得冇問題。到活動正式舉行，雨勢稍為細 d，可能落過雨關係，而且又有 d 風，我地 4 個都覺得好凍，我凍到隻腳痛咁滯，可能咁樣既關係反而冇咁緊張，雖然今次都有 d 食螺絲位，不過都冇乜大影嚮，算叫有 d 進步，今日唯一出左少少意外既可能係班小朋友表演跳舞果陣，可能個場地太滑，有個小朋友跌左幾次，唔止佢父母擔心，我地重驚過佢，呢個台落雨真係唔係咁適合跳舞，下次要小心 d。到差唔多 4 點半，講埋致謝詞成個典禮完結，對於我黎講算係成功，唔知其他人點睇。

12月9日 (星期一)

今日好凍，得 14 度，原本諗住放工拿拿臨返屋企，點知 wendy 打黎話有 d 野要幫手，於是今日又冇返屋企同左 wendy 食飯，今日去左荃灣果間雪國拉麵度食，好耐之前幫襯過一次，味道一般，今日再去食同上次差唔多，一個定食要成 60 幾蚊，好似唔係咁值，不過算啦，都諗唔到食乜，今日同 wendy 傾左黎緊呢個星期日同 miko 做生日同埋遲 d 聖誕出黎玩既野，不過都未落實，要睇埋其他人到時點先決定，今年過得好似好快咁，真係唔覺唔覺又做左廿幾年人。

12月10日 (星期二)

眼眉跳呢個情況好似惡化左，攪到隻右眼成日好似扁晒大細眼咁，都唔知做乜。又見到幅得意既圖，俾大家睇下。

12月11日 (星期三)

買左部數碼相機咁耐都未試過張 d 相拎去曬出黎睇，為左睇下佢 d 質素決定抽 20 張去一間曬相舖試，去左間荃灣出名多人曬相既舖頭，唔知佢係咪做緊優惠，每張都係 1 蚊，3R 同 4R 同價，而且好快有得拎，個半鐘就得，睇過 d 質素之後發覺又真係幾好，d 顏色好 sharp，重好過用我部傻瓜機，又唔駛沖曬費，如果可以解決耗電量既問題既話睇黎取代傳統相機都係遲早既事。夜晚出旺角食飯，順便去旺角買野，唔知點解今晚咁大雨，又凍，食完飯隻手都重係好似冰咁凍，不過聽講過兩日又會暖返，都唔知 d 天氣想點。

12月12日 (星期四)

今晚一返到中心，就有人俾左封信我，當堂頭頂出左幾個問號唔知乜事，拆開一睇原來係一張請貼，原來有人結婚喇，雖然都想去，不過佢地行禮果日就係出發去清遠既日子，撞左期睇黎都去唔到，唯有遲 d 約佢地出黎食餐飯恭喜佢地啦，真係替佢地開心。

12月13日 (星期五)

今晚係青遠交流團第二次既工作坊，今晚中心安排左普通話導師教我地國語，呢位張老師教得好幽默，同佢一齊上堂就好似玩一樣，好開心。佢唔單止國語厲害，而且佢先生重係日本人，今晚佢個仔重有上到黎中心，成班人見到即刻走出去同佢玩，重受歡迎過 d 明星，重有半個月就出發喇，不過好似乜都未準備咁。

12月14日 (星期六)

今日睇報紙見到原來呢個月都有好多大型展覽同埋嘉年華舉行，好多都有興趣去，好似有工展會，深水步電腦節，舊啟德機場既嘉年華，灣仔冬日嘉年華，黃大仙藝墟，會展電腦遊戲展等等，唔知去得到幾多個呢 ?

12月15日 (星期日)

今日係 miko 牛一，我地今日就上左佢屋企同佢做生日，亦都去睇下佢新搬入去間屋度睇下，今次呢間屋比佢以前住果間大左，睇落都幾舒服。今次我地買左個米奇老鼠生日蛋糕入去，而生日禮物我就買左個養水草既擺設品俾佢，希望佢唔好養死佢，呀榮同呀華就唔知上黎做乜，剩係起度睇電視，重要係陳年舊片逃學威龍 2，俾佢地激死。食完蛋糕後就出返沙田睇無間道，呢套戲個節奏拍得好快，好爽，都幾好睇，結局都有少少出人意表，果然係今年既聖誕大片。夜晚等埋肥健同呀 ming 兩個會董就去左間意大利餐廳食飯，之前我試過所以推介佢地黎，味道都唔錯，襯今晚亦都開左豬扒同好會幹事會議，討論議題係平安夜究竟去邊好? 吸收過舊年起尖沙咀迫餐死同埋搵野食困難既麻煩之後，今年應該未必會再去，最好可以 BBQ 或者可以搵間屋成班人匿埋玩就算，都係等佢地全部覆實先落到決定，期待。

又大一年既 miko

米奇生日蛋糕

miko 手中既水草就係佢份生日禮物。

12月16日 (星期一)

今晚去左旺角一間酒樓打邊爐，個 fd 話呢間野幾好所以大家去試一試，雖然今日有成 20 度，不過間酒樓 d 冷氣都幾勁，食落都唔覺太熱，而且份量同味道都幾好，埋單每人都唔駛 100，算係唔錯，之後行旺角，見到 d 商場都幾旺，可能係聖誕節就到 d 人係咁買野，我都襯而家睇下買乜聖誕禮物，不過都搵唔到乜野心水，遲 d 再睇。

12月17日 (星期二)

自從西西調左去學校返工後都未見過佢，襯今日約佢出黎順便預祝佢新婚快樂，今晚出席既都係去唔到觀禮既朋友，西西個樣都冇乜點變，只係頭髮留長左，菠蘿今晚就好似發左癲咁，成日問西西結婚 d 野，睇落佢重開心過西西。而且今晚我地無意中發現左另一個人既秘密，成日口邊唔講呢 d 野既呀榮鐘於要講呢 d 野，究竟呢 d 野係乜呢 ??

12月18日 (星期三)

今朝一返到公司先知楝大廈停電，成個朝早就咁坐左起度乜都做唔到，到下午先至有返電。夜晚去左醫院探外婆，今日見佢同上次比較精神左，不過暫時佢都唔可以食野，只係駁喉俾 d 營養佢，唔知佢幾時先可以出院。

12月19日 (星期四)

今晚起電視度見到樹春上鏡，重要係皆大歡喜，雖然佢做一個唔起眼既角色，不過大家見到佢上鏡都好鬼興奮，唔知會唔會係明日之星呢?

12月20日 (星期五)

今晚係青遠交流團第三次既開會，由於之後又要去聽另一個禁毒 talk，所以上左 9 個字堂就落堂，成班人之後搭的士出去，起大會堂無無聊聊坐到 9 點半先走。之後去左食野，由於星期一去 terri 度賀佢新居入伙，而且有呀欣親自下廚煮野食，大家都抱好大期望，哈...不過睇落要做下心理準備先好，暫時定左好多食物，如果全部都食到就完美。

12月21日 (星期六)

難得星期 6 返半日，終於可以用 d 時間黎休息，起街買左 d 花紙，重睇左 d 結婚公仔諗住送俾人，不過都未買住，遲 d 先決定係咪真係送呢隻好。返到屋企就包左 d 聖誕禮物，今年買左 d 我自己好滿意既送俾人，唔知收到果個會唔會開心。

12月22日 (星期日)

今晚屋企做冬，點都要起屋企食飯，叫呀媽煮晒自己最鐘意食既野，有雞翼又蒸魚，重有海鮮湯，食飽飽就起度睇左 vcd，今晚天氣由 20 度跌到去 12 度，聽日起身一定好難受。起網上面見到張英雄既圖，入面有個地方好攪笑。

就係地下有個對講機

12月23日 (星期一)

平安夜前夕，今晚我地上左 TERRI 間新居度食飯，順便試下呀欣既手勢，去到果陣佢只係整左兩樣食物，起抬面重有未蒸既魚同埋春卷，不過好彩有 FANNY 同 TERRI 兩個幫佢手，如果唔係唔知幾時先食得，見佢地 3 個不斷起廚房出出入入，好似好忙咁，不過又真係好攪笑，又驚俾油彈親又怕熱，坐坐下就聽到廚房有人叫，俾佢地笑死，原本拍左段好攪笑既短片，不過呀榮佢又唔小心同我洗晒，俾佢激死，到 8 點鐘終於有得食，呀欣佢地辛苦左咁耐總算冇白費，7 送一湯大功告成，之後等人齊終於食得，味道都唔錯，初頭個個都懷疑呀欣既技術，睇黎以後大家叫佢做大廚先得，今晚重見到 terri 個家姐，佢地兩個真係有成 9 成相似，話佢地係孖生都有人信，連髮型講野既語氣都一樣，如果起街度見到實認唔到邊個打邊個。食飽飯睇陣電視就到今晚既壓軸環節，交換禮物，今次每人準備左一份聖誕禮物，因為呀榮冇準備到所以由佢做抽獎嘉賓，今晚有幾份禮物都幾騎尼，最攪笑應該都係呀欣果份，一到要抽佢果份 fanny 就叫晒救命話千其唔好抽中佢，大家都心知不妙，最後由 kc 抽中，打開一睇，發覺原來係一隻哈姆太郎既搖控公仔，當堂笑到肚痛，估唔到佢會送隻咁既野，其他人送既就有浴室磅，暖水壺，頸巾等等，我就抽中左 fanny 既無印良品記事簿，我送既就係種四葉草既盆栽就由呀欣抽到，聽講可以種得出四葉草就會得到幸福，不過機會相當微，唔知係咪真係種到，聽晚平安夕又會玩交換禮物，唔知佢地又會準備 d 乜出黎。

今晚既大餐

睇下左邊同右邊，分唔分到邊個係 terri 同佢家姐

禮物一大堆

12月24日 (星期二)

一年一度既聖誕節又到左，亦都係起我心目中一個重要既日子，今年由於大家唔想出去迫，所以決定去 bbq，我搵左間天水圍既任食 bbq，之前從未去過，連點搭車去都唔知，好彩有佢地 d 傳單跟住去，呢個燒烤場話大唔大，其實即係一塊空地再改建而成，冇乜特別。不過佢地食物方面都叫唔錯，一般既都準備到，而且重係任食，食完可以再叫，不過就唔包野飲，飲品一般都要 7 蚊一罐，算係可以接受，今晚出席既有中心職員同埋豬扒同好會既幹事，今次我地又玩交換禮物，吸收左尋晚出現搖控哈姆太郎事件後，其實大家都有 d 驚，唔知又會唔會有呢 d 咁 (新奇) 既聖誕禮物，最後大家抽到既都係以實用為主，而我就抽到一個 keyboard 既軟手墊，都幾 0岩用，而 terri 佢地今日送左件衫俾我、肥健重有 jennifer 話係佢地職員夾錢買黎送俾我地話多謝我地成日幫佢地做義工，多謝佢地先。燒完野食之後，就諗住行出去天水圍巿區，點知行行下中途盪失路，果陣時剛剛 12 點，估唔到聖誕節就搵 d 咁既野攪，不過大家都冇忘記要講返聲聖誕快樂，到最後都好彩搵返條路出去，行到天水圍中央公園搵個空地坐低就舉行我地第二個壓軸活動，聖誕祝酒儀式，肥健佢今日買左支tecnque 用七喜開黎飲，除左 jennifer 同呀華唔飲得外，其餘 9 個都有飲，支酒實在太勁，酒精含量 40%，就算 1 開 3 全部人飲左都覺得 ring，肥健話可能酒既份量太多，就算開左 7 喜入去都完全飲唔到果種味，同飲火酒冇乜分別，飲左酒之後大家都呆呆滯滯，於是就塔車出返荃灣，出到去已經兩點，搵個地方坐低飲野解一解酒，大家決定下次飲香濱算，唔好玩咁激，肥健佢飲左差唔多 3 杯，已經好唔掂，要截的士車佢返屋企，返到去都成 3 點，頭重重咁，沖埋涼上陣網成 4 點鐘先訓，呢個平安夜咁就過左，算係做左好多野，玩夠。

12月25日 (星期三)

聖誕節正日，尋晚 d 醉意重未消晒，訓到成 1 點先肯起身，個頭重有 d 痛，今日約左菠蘿佢地去工展會，如果冇記錯應該係連續第三年去，其實都冇乜特別野想買，只係想 8 掛睇下有冇好野買到，唔知係咪今年最後一年起天馬艦舉行，所以有好多人，今年又見到果幾間本地品牌，好似零食物語、余仁生、保濟丸等等，重有往年都見過既其他熟口熟面既參展商，今年好多參展商都整左 d 真人扮既公仔同人影相，好趣緻，呀榮就不失佢為食既本色，差唔多試齊所有試食攤位，重要樣樣試完樣樣俾評語，行行下菠蘿同呀榮竟然起地下執到 50 蚊，哈 ....我地今晚既飯錢又有著數，未試過起地下執到 50 蚊，超 lucky。今日行左咁耐得我買左個捉小強既屋企，設計其實好簡單，賣 10 蚊，買黎試下。去完工展會就順便行去灣仔睇燈飾，途中經過會展，原來果度有個 game show，好多人扮遊戲機既角色，有 d 都幾似，之後行去金紫荊廣場睇棵 10 層樓既聖誕樹，不過行埋去睇又唔係好高咁。之後搭小輪出去尖沙咀，今日依然好多人，搵個地方食埋飯就去行海傍，今年 d 燈飾真係冇以前咁靚咁多款咁，反而多左 d 幫人影相既攝影師，一張要成廿幾三十蚊，重用電腦執到靚靚先俾人，都見到有人幫襯。由文化中心行到去尖東，影左 d 相後就諗住搭車返去，途中經過機舖見到有部拖狗散步機，原理同跑步機相似，玩左一舖可能唔慣成腳抽筋咁滯，又索散氣，不過幾攪笑，d 狗既樣都好攪鬼，玩到累晒先搭車返去，聽日又要開工，咁就過左兩日假期，有 d 唔捨得。

12月26日 (星期四)

今日好凍，得 9 度，好彩今日公司都有 d 野做，如果唔係實凍死，夜晚同 Louis 出左旺角行街，順便去買送俾西西既結婚禮物，本身都睇定左一隻目標，諗住去格下價，不過行左好耐先見得兩間有，價錢又一樣，最後起 chin 之堡買左，希望西西同 ralph 鐘意。之後就睇自己野，想去買對鞋，不過冇乜邊隻款 0岩心水，反而去行其他地方就買到野，好似 CD、漫畫、CDR，計計埋埋又用左 200 蚊，呢個聖誕都用左好多錢，黎緊張信用咭既單真係有 d 擔心。

12月27日 (星期五)

今日重凍，得返 7 度，又落雨，朝早起張床都唔願起身咁滯，重帶埋個水袋返公司裝 D 熱水當暖手袋用。夜晚返中心開最後一次清遠交流團會議，聽日講果邊尋日落雪，聽到都好開心，希望到時見到。今日已經落實晒大家既工作，時間太緊迫，開完會就整集體遊戲玩既道具，今次帶左好多野上去送俾當地既居民，一袋二袋紅白藍真係好有返大陸 feel，不過到而家都未執行李，聽日要快手 d 攪掂先得。

12月28日 (星期六)

聽日就出發去清遠，今日就開始執背囊，經過吉之島見佢今日大減價，起果度買左 d 零食以備不時之需，然後返到屋企開始執其他野，衫佔左大多數，其他野都唔算太多，聽日重約左佢地 6 點 3 去飲早茶，要早 d 訓先得。

12 月 29-31 日請到 1 月篇觀看