2003年2月

2月1日 (星期六)

大年初一，恭喜發財，新年快樂，咁又過左一年，舊年我都過得幾開心幾滿意，希望今年更加好。朝早去左外公度同埋舅母一家人食飯，不過今年外婆重起醫院未出黎，而呀姨又要返工，往年可以開兩抬麻雀今年都冇打到，食完飯坐左陣就塔車返屋企，覺得今年悶左好多。

2月2日 (星期日)

年初二，往年慣例都係去住起樓上樓下既姑丈姑媽度拜年，每年佢都整左 d 蘿白糕同年糕俾我地食，味道依然冇變咁好食。之後下午就有表姐黎拜年，每家帶一盒餅黎咁又收左成 7 盒，有排食，拎 d 去拜年先得。夜晚就出荃灣睇 007，今日好多人睇戲，好彩排隊買飛都唔駛排好耐，今集007 同以前果 d 都冇乜大分別，又係一個打一百個都冇事，不過今集玩高科技玩得好誇張，現實都冇乜可能發生，而且有 d 攪笑地方重好攪鬼。

2月3日 (星期一)

年初三今日係赤口，不宜拜年，跟據往年慣例都係留起屋企唔出街，成日就留起屋企玩電腦，訓下覺咁，冇意思既一日。

2月4日 (星期二)

今日去左 eva 屋企，參觀佢屋企，佢老公 wilson 好本事，成屋既木器家俬多數佢整，整得好有心思好靚，今晚既晚餐重係佢下廚，煮得好好食，且又睇左佢地去旅行同結婚果陣影果 d 相，wilson 佢影相影得好好，有 d 重係影左好多張先拍得到果種效果，佢真係一個入得廚房，出得廳堂既好男人。

2月5日 (星期三)

今日去左睇行運超人，好有一貫賀年片既風範，睇完都幾開心，楊奷嬅依然係傻大姐，反而鄭中基同埋梁朝偉都做得幾好笑，有 d 客串既角色都好出人意表，由於起睇戲果陣食左爆谷，睇完果陣都重好飽，於是就起沙田行來行去睇野，原本諗住買電芯叉電器，不過起百老匯睇過都唔平，都係唔買住，遲 d 出深水步買可能平 d。

2月6日 (星期四)

今日原本 kc 約左去踩單車，不過到最後有大部分人做左飛機師甩底，到最後得返我.....jennifer 同埋 kc，於是就諗下之後做乜好，最後決定左去南丫島，今次係第二次去喇，落船就行另一邊少人行既地方，呢條係行山徑，話長唔長，都唔算辛苦，由 1 點幾行到差唔多 4 點先出返去碼頭，而且重未食野，忍唔住要幫襯下 d 海鮮檔，叫左 3 個送，最有特色既係一個糯米飯焗蟹煲，好好食，不過亦係最貴，要成二百幾蚊一個，埋單成 400 蚊，超級昂貴既一個下午茶。塔 5 點幾班船出去，返到去沙田 k c 屋企都成 7 點幾，join 埋 fanny 佢地就買野食打邊爐，原本諗住食左野打底唔會食咁多，點知好似重食得多過平時，聽日係初 7 既關係，yawn 重買左個蛋糕話一齊做生日，好有心思，又有香濱，不過味道麻麻，都係鐘意飲檸檬茶，走果陣成 11 點半，送埋 jennifer 返屋企都成 12 點 9，聽日上大陸玩，希望夠精神。

2月7日 (星期五)

今日同肥健、樹春、fanny、欣同 terri 約埋上大陸玩，朝早先起羅湖搵間酒樓飲早茶，間酒樓都幾靚，特別係個廁所，未見過廁所入面竟然有梳化，乾淨程度同 d 酒店有得比，食物亦都係即叫即做，唔錯。食飽就出發去第一個地方，國嶺公園，玩左個旱地滑草，坐起一塊板上面滑落黎，都幾刺激，收 3 0 蚊，公園入面重有個機動遊戲，類似洗衣機咁將個人轉來轉去，玩完之後食果 d 早餐差 d 俾佢搖左出黎，不過收 5 蚊又真係幾抵，呢度重有水上單車，小型賽車，同埋其他攤位遊戲，d 攤位既禮物連白兔同雀仔都有，攪笑。玩完之後沿本諗住行出馬路塔車，點知個出口出乎意料咁遠，行左差唔多成半個鐘先出到，腳都軟，再塔的士去另一個地方玩室內小型賽車，6 0 蚊玩 1 0 分鐘，第一次玩，架車好快，聽講最快可以去到成 60km，賽道有成兩層高，幾好玩，不過撞左一次真係幾甘，好似內藏都移左位一樣，我玩左一次其他人就玩兩次先甘心，不過同香港果個比呢度真係平好多。玩完賽車後就返酒店放低 d 野先，terri 佢今次幫我地 book 左間 5 星級酒店，大堂已經好靚，上到房一睇....歎為觀止，真係好靚，未見過房入面有夾萬...成塊落地玻璃睇到出面，最衰唔係海景，雪櫃又放左好多野食，不過除左支水其他樣樣要收錢，汽水都要成 33 蚊罐，搶錢，不過呢間酒店租金都唔平，果然係 5 星級。放低行李就塔車出返去華強北路果邊食野，果陣已經 4 點幾重未食lunch，大家都好肚餓，於是就求其搵左一間賣香辣蟹既舖頭食，但味道麻麻，覺得有 d 搵笨。食飽就入商場睇野 shopping，有個商場 (唔記得乜名)，好大間，乜都有得賣，fanny 同樹春兩個玩雪櫃玩到唔停得手，不過又真係幾勁....3 萬蚊個雪櫃第一次見，而且重見到有老鼠愛上貓既 vcd 賣，連香港都未上佢已經有，厲害。買左 d 啤酒汽水後就塔車返酒店附近玩推拿，d 師父全部都係女人，同我整果個都做得幾好，真係有 d 功夫，成個鐘頭都係 30 蚊，佢地都幾辛苦。完左之後食少少野返酒店沖涼睇下電視，呀欣佢準備左副塔羅牌同我地玩，唔知佢同我卜果 d 野係咪真係會發生，天知......。跟住又玩啤牌，7 級豬，輸左要著住件浴袍出走廊行，樹春繼上次起清遠輸左後今次又再下一成，著浴袍起走廊度行，重俾人睇到，笑死。玩完之後返房睇陣電視就訓，今日隻腳行左好多路，好累。

2月8日 (星期六)

第二日深圳之行，原本佢地話 8 點半起身食早餐，點知 3 個女仔訓到成 9 點半都未落床，咁又等到 10 點先出發，食完早餐後就去歡樂谷玩，返酒店執野 CHECK OUT 就出發，不過肥健佢唔玩機動遊戲所以自己返左香港先，得返 5 個人。入到去最主要係玩機動遊戲，不過真係排好耐，玩果 3 分鐘唔夠但要排成一個鐘先玩到，TOTAL 玩左 3 個，滑浪飛船，越礦飛車同埋一個叫雪山飛龍，最剌激應該係雪山飛龍，( 即係吊住腳果種過山車，轉到頭都暈埋，連叫出聲既機會都冇，全程合埋眼，真係好激。不過今次好多地方都冇去到或者冇玩，俾左呢 120 蚊入場費都唔係好值，第時真係要 PLAN下點行先得，都好大。玩完之後大家都好累，坐車出返火車站返出香港，重辛苦過去完清遠返黎，咁又過左兩日，我既農曆年假好快完。

2月9日 (星期日)

最後一日假期，玩埋就返工，原本諗住起屋企抖抖，點知呀榮打黎約今晚出去食上海野，之前呀欣話買左張被俾我做生日禮物，約我今日去拎，出到去一睇，張野純白色，幾靚，重有個枕頭袋，又係白色，將來用果陣要勤 D 洗先掂，呀欣佢重開心過我，話張被點好點好，成個 SALES 咁。跟住就出旺角 JOIN 呀榮，佢今日見醫療輔助隊，佢話考體能同面試都幾辛苦，唔知佢得唔得，不過佢又搵唔到間上海菜館，睇黎執左，於是同佢去食味千拉麵算數，食飽就周圍行下買 D 野，跟住先返屋企，最後一日假期就咁過左。

2月10日 (星期一)

假後第一日返工，可能係假期後個 mood 重未返，做野冇乜手機咁。夜晚返到屋企就拆利是，今年收到好多慈善獎卷 (10 蚊紙)，睇黎經濟真係重係未有起色，今晚重換左呀欣送既被同床單，不過張被薄左 d，要加多張顫先夠暖，隻貓就好開心，跳上上面行一陣就起上面訓覺，睇黎幾 0岩佢口味。

2月11日 (星期二)

過年後老細第一日返黎，佢一起度就會多左好多野做，不過無聊野居多，對住佢成日都幾辛苦。

2月12日 (星期三)

夜晚出街返到屋企俾姑媽捉左去佢度食菜茶，好多年冇食過，不過我始終唔係太鐘意食，或者口味唔 0岩。

2月13日 (星期四)

新年後第一件唔好既事發生左.....實在令大家唔開心。

2月14日 (星期五)

今日又係一年一度既情人節，不過對我黎講冇乜意思，夜晚返中心開網頁班，竟然都有人派朱古力，算係老懷安慰。

2月15日 (星期六)

元宵佳節，中心例牌都有活動攪，我就負責燈迷對答案派禮物果 PART，好多街坊都有落到黎，不過好似最多人係今年咁，個個攤位都排晒隊，我地都忙到飲水時間都冇，又嘈，疲勞轟炸咁，有幾個小朋友重圍住我後面攪攪震，不過又好鬼得意，都唔捨得話佢，開頭派禮物都冇問題，不過臨完前 D 人就開始失控，想搶咁滯，不過見咁多禮物剩就冇所謂，皆大歡喜，人人有分。

2月16日 (星期日)

今日中心有個獎勵義工既 WAR GAME 活動，朝早 9 點大家集合，差唔多玩開義工果班人都有出席，重有一 D 學校同埋 D 後輩義工一齊黎，加埋成 40 人，有玩開 WAR GAME 既呀健就帶埋佢支私家槍出動，睇佢既裝人備就知佢有幾專業。不過玩既地方同時間都唔係好多，朝早剩係我地班年青義工一齊玩，下午就夾埋班小義工玩，睇佢地細細個好似童兵一樣，都幾得意，今日都幾舒服，又唔算太熱，不過呀健把槍真係好勁，俾佢射中左塊面真係損左流血，好彩冇破相。夜晚就代表屋企出席姑丈壽宴，好悶，全場 30 人我係第二細，同我同抬既人個個都大我 30 年以上，又講潮洲話都唔知佢講乜，為有係咁食野，不過 D 野幾好食，聽講成 3 千幾蚊一圍，返到屋企成 11 點幾，好累。

軍佬健

2月17日 (星期一)

表姐部電腦又壞，今次我決定同佢洗晒所有野再做埋 backup，免後顧之憂，之後就起佢屋企打邊爐，第一次食用泥猛魚放入去原來都幾好食，d 湯重可以飲，不過都幾腥，飲完成口魚味。

2月18日 (星期二)

miko 老師突然話想唱 k，就陪佢癲唱返一晚，我都好耐冇唱，neway 呢排有 buffet k，49 蚊，d 野都幾好食，剩係食野都值得，d 歌都幾新，不過多數都係英皇 d 歌手為主，今期主力推介尹光果首少你呀爸，都幾好笑，雖然話係 49 蚊，不過加埋 unt 果 d 雜費都要成 120蚊，都唔係平。

2月19日 (星期三)

中午同老細一齊上大陸，之後落返黎見又未夠鐘打波就返屋企抖左陣，夜晚就同小吉佢地一齊打羽毛球，好耐冇同佢地打過，都打得幾激烈，用晒我 d 能源咁滯，重叫左佢地星期日帶我地去行山，佢地話大嶼山有度想去，就跟佢地去，但佢地鐘意尋幽探秘，行埋人地 d 唔行既地方，希望到時大家平平安安返黎，但我絕對放心，信得過佢地。

2月20日 (星期四)

一件聽落簡單既事，攪攪下變得好覆雜，都唔知點處理好。

2月21日 (星期五)

肥健為左慶祝佢隻腳好返，就約左今晚出街食餐好，之前落左深水步睇野，覺得自己部電腦真係越黎越慢，真係想 update 佢，不過都係等下先，而家都重應付到。之後就出旺角食鐵版燒，呢間野成日都經過不過未試過，個師父 d 技術好好，睇佢都係好後生咁，又整得幾好食，叫左個二人餐，再加個刺身，埋單都係 250 蚊，幾抵，下次想試下佢果個龍蝦餐，好似好正咁。

2月22日 (星期六)

今個星期出左 5 日街，今日要起屋企休息，聽日行山要養精畜銳，好耐冇行唔知掂唔掂。

2月23日 (星期日)

今年睇黎真係犯太歲，原本今日行山應該開開心心，點知就硬係發生 d 唔好既野。朝早 9 點先起東涌食早餐，出發去我地既目的地天顫大佛，個個星期日都咁多人塔車入去，我都係第一次去，點都上去睇一睇，個佛好大好靚，大紅寶殿出面 d 石柱既雕刻好精細，唔知係咪用人手整，睇下影下相之後就行去尼勒山既山腳準備出發，今日冇乜太陽，個天成日都係陰陰暗暗咁，唔駛幾耐就上到山頂，可以睇到機場，坐起度食完 lunch 就開始落返山，個電話唔知點解就呢個時候壞左，之前重可以傾到，真係激死我，上山果陣重讚佢話用左年幾都冇問題，轉頭就同我玩自殺，又要買過一部。落呢個山都有 d 難度，好多雜草，好跣，wendy 太耐冇行都幾辛苦佢，邊落邊抖邊影相，落山條路可能真係冇乜人行，全程一個人影都冇，差唔多用左 2 個半鐘先落返去大馬路，之後重要行條大路出返東涌，沿途經過一條村，聽講入面有棵大樟樹，小吉同呀基就抱住尋幽探秘既精神，開頭以為起村入面，但原來係起村後既山坡，入到去一睇，真係好大，5 個人用手都圍唔晒佢，我黎過呢度兩次都唔知，出返去塔車果陣已經成 7 點，估唔到行左咁耐，total 12 公里，不過隻腳都唔算太累，最大既損失係行完山壞左個電話。

(相片可到我的相簿睇到)

2月24日 (星期一)

原本諗住尋日行完山隻腳點都會痛，不過好彩只係有少少累，但條頸好似曬親，有 d 痛。

2月25日 (星期二)

上個星期 m iko因為話星期 3 放假而去唱 k，今次到 wendy 又話早收工要唱 k 慶祝 (佢早收工既定義係晚上 7 點走得)，今次去旺角 neway，同荃灣果間唔同，佢地冇巴西燒烤，反而有中或日式既自助餐揀，我地試左中式果個，d 野食都 ok，不過款式唔多，豆沙煎餅最好食，重有自助車仔麵，今晚可能少人，佢地俾左間 1 0 幾人既大房我地，真係訓起度唱都得，不過後來轉返細房，而且唱到夠鐘都未叫我地走，玩到我地嗌埋單，乜都唱夠。

2月26日 (星期三)

明天要出席喪禮，點都有 d 唔開心。

2月27日 (星期四)

今日係外婆出殯既日子，每次出席完喪禮都有頭痛，可能自己諗得太多。

2月28日 (星期五)

朝早幫手攪外婆喪禮，送到佢去火葬場最後一程，之後大家都算完左一件事，外公同呀姨都好似冇咁唔開心，佢俾我地係一個開心果既形象，我亦都會記住佢果種笑容。