2003年1月

12月29日 (星期日)

今日係出發往青遠既第一日行程，原本約左其他人一早去荃灣飲茶，之前果晚較定鬧鐘 5 點鐘嚮，點知佢竟然起 4 點 8 冇電停左，當然唔知醒，好彩 fanny 6 點鐘打電話黎，即時彈起，拿拿臨換埋衫就搭的士去 billy 度幫佢拎野。6 點半去到酒樓，見返以前起中心做 pa 既呀毛，開頭都認唔到佢，睇耐左先認得出，都冇乜點變，係個頭染左紅色，飲茶飲到 7 點半就去德華公園準備搭大巴出發，可能係第一日，大家都冇起架車訓覺，於是又拎出兩樣旅行必備用具，啤牌同 UNO，起車上面係咁玩，塔左 3 個鐘頭車，終於到左目的地，清遠，果度得 10 度左右，都覺得幾凍，好彩已經帶定多 d 衫以防萬一。之後去到清遠巿一間酒家食午飯，可能 d 味道唔係太適合我地口味，大家都食得唔多。食飽飯後導遊俾左段時間我地行陣街，感覺上同行深圳差唔多，冇乜特別，行完商場就再搭車去我地今日第一個探訪既地方，福利院，入面住左 d 老人家，同香港既老人院差唔多，每間房住左 4 個左右既老人家，不過部份都係行動不便，睇返個環境其實唔差，樓下有一個大花園，聽院長講解完佢地既歷史後就同 d 老人家傾偈，有一個同我地傾好投入，講左佢以前好多野。逗留左一個小時後就出後去另一個地方，消防局，佢地好專重我地，未入去門口已經排左兩行隊拍手歡迎我地，上到去重預備左水、花生同埋生果，好似拜年一樣，佢地既消防局長重講解左消防員既歷史同埋佢地工作既概況，我地重睇左佢地消防員既宿舍，見佢地張床好整齊，d 被同制服摺到起晒角，好似軍人咁，重睇左佢地消防設備，好似消防車，防毒面具等，最神奇係佢地有一個模擬濃煙密佈既房間，入面好大煙，入到去跟本乜都睇唔到，出返黎個個都話好黑但好過癮。完左參觀消防局後再搭車入去我地未來三日住宿既地方......連南。再搭左 3 個鐘頭車入到去已經成 7 點，由於今晚有篝火晚會既表演，我地想睇埋先食飯，於是就去睇埋先，其實係一班少數民族既表演，多數都係講返佢地既民族特色同埋一 d 舞蹈表演，我地班人一見到有得參與其中就發晒癲咁湧出去，好似有金執咁，睇左 1 個鐘左右覺得冇乜特別於是就返去食晚飯，今次大家可能太凍太餓，見到大家都食左好多野，而且味道亦都唔錯。到夜晚返到賓館休息，今次我同老馬一間房，間賓館都唔算太差，不過有 d 人話沖涼 d 水沖沖下就冇，好彩我間房冇呢 d 事，夜晚當然唔少得啤牌活動，玩凍柑拍棉胎，輸左果個要食凍柑，呢 d 天氣玩就最正。

我們鴻圖大志

12月30日 (星期一)

7 點半起身執埋背囊就去食早餐，好鬼凍，真係唔想離開張被。食飽就塔車去當地既大麥山中學同當地學生交流，聽校長講解完佢地學校特色，知道佢地起今年會有電腦堂，讓當地學生接觸資訊科技，他們亦鼓勵當地學生在入學年齡上學，即使沒錢交學費學校亦會讓他們就學之後才收。然後我們到他們的課室觀看他們的學習模式，睇返佢地既課本其實英語水平一 d 都唔落後，學生亦都態度積極，我地重教左佢地唱兩首簡單既英文歌。之後同當地學生玩左 d 集體遊戲，初時佢地都表現得幾拘謹，後來都見佢地玩得開心同投入，完左學校探訪後後就塔車深入連南我地第二同第三晚居住既農村，我地今次準備左棉被送俾我地居住既民居，每 2 個人一間房，我住果間相當唔錯，間房有門，而且都幾乾淨，係個窗爛左，呢條村既人都係姓房或姓唐，有好多小朋友同老人家，反而好少見到青年，可能出晒巿區工作，佢地間屋其實好簡陋，只有簡單的抬及椅，燒柴煮食，沒有水喉要自己打水，不過佢地都有電燈，有一塊耕地同埋飼養了一些牲畜，完全自給自足的生活。我地呢一餐午飯就起農戶入面食，當然唔可以同賓館果 d 比較，但食得飽都不成問題。我地發現條村有積雪同雪人，原來佢早幾日落雪而家 d 雪都未溶晒，錯過左一次睇雪境既機會。下午再出發去三排瑤寨參觀，呢度境色都幾好，如果唔係大霧既話一定更靚，呢度又有民族表演，同第一日睇果 d 差唔多。返到村入面就準備煮晚飯，幫佢地手炒左 d 菜，雖然用木點火，不過火氣都幾猛，d 野好快熟，晚飯之後就沖涼，由於太凍我都冇沖，剩係抹身就算，之後成班人傾返聽日小學探訪玩遊戲既野之後就返屋企，由於當地村民都好早訓，我地又唔可以起出面留到咁夜，各有各回家，夜晚肥健佢地黎左我果邊玩啤牌，又拎晒 d 零食出黎食，我買左包字母餅好抵食，成晚都係食左半包，聽晚可以繼續。

12月31日 (星期二)

今日我地要去探訪既地方係當地小學大麥山小學，我地除左睇左佢地上課外，今日重同佢地玩左 d 集體遊戲，180 個小學生起個操場一齊玩，都幾熱鬧，佢地乜都可以玩一餐，一張爛紙，一個鐵罐都好開心。玩完遊戲後我地就幫佢地手油欄桿，雖然唔算係乜野大工作，不過我地都好落力去做，效果算係幾好。今次午餐我地起小學入面食，佢地預備左成蘿蕃暑俾我地食，樹春重買左可樂黎飲，雖然冇飲唔係好耐，不過都好高興。下午我地返入村探訪貧窮戶，我地去左一個只有老婆婆獨居的家，呢度同我地居住既村屋環境更加惡劣，屋企面基本只有一張大抬及兩張椅，睡床只不過是一塊木板，沒有農地，亦沒有飼養家畜，只有一個親友住在附近和她聯絡，這種生活和其他村民相比已經相差很遠，估唔到同一條村生活的人貧富差距亦這麼大。探訪完結後就去其中一個農戶嘗試耕田既感覺，幫手翻土，摘蕃薯，第一次試都幾好玩，不過 d 村民話 d 蕃薯唔好食剩係用黎餵豬，要起另一塊田種果 d 先得，有 d 失望重諗住營火會果陣拎去煨。下午 4 點幾見重有 d 時間就玩陣啤牌，玩七級豬果陣樹春輸左，要去錫豬，見到佢輸成班都好開心，叫到成條村都聽到咁滯，最後當然半強迫下錫左隻豬一啖，笑到肚痛。又買左 d 蔗返黎食，玩吐得鬥遠，當然會掃返乾淨。夜晚食完晚飯後小學果邊舉行歌唱比賽，原本諗住去睇下，不過等左好耐都未開始，導遊又為我地準備左營火晚會，於是未等到開始就走左，去到營火會我地成班就跳營火舞，又燒煙花，引左一班村民黎睇，d 煙花都幾靚，重要咁近睇，呢個除夕夜就係咁過。

清遠小學生

1月1日 (星期三)

最後一日既清遠之行，7 點半起身，同接待我既村民拜別後就塔 8 點鐘既車出返清遠巿，之後去到一個磨菇養植場參觀，睇到好多平時冇乜機會見到既菇類，可能我地呢幾日都冇乜點駛錢，今日終於有機會買野，一袋二袋咁拎走，我都買左包東菇同埋蕃薯乾送俾人。然後就食菌宴，係類似火喎自助餐，不過多左好多菇類食品選擇，呢餐大家都好搏命咁食，真係食到夠鐘先捨得走。最後終於要搭車出返香港，完左今次 4 日 3 夜既行程。出到香港 5 點幾，成班人又再去 pizza hut 食野，幾日唔起香港個人好似 out 左咁，呢日天氣暖 d，但我地個個著到好似個波咁，有 d 另類，返到屋企雖然 8 點，不過好多野要洗，最緊要再沖多次靚涼，出返黎成個人爽晒，始終自己屋企好 d，我覺得而家自己既生活真係好過好多人，真係要珍惜身邊擁有既一切。

最好的一餐

1月2日 (星期四)

起身發覺喉嚨痛，睇黎起清遠冷親病左，而且塊面好乾，重甩皮，要搽返 d 野先得，夜晚返左中心 d 人都話我個樣好累，但自己唔覺，可能傷風啦，希望快 d 好返。

1月3日 (星期五)

今晚係清遠之行既檢討會，見返佢地發覺都有幾個病左，大家真係唔習慣果邊天氣，睇返 d 相發覺有 d 都幾攪笑，今次呢個團除左老馬同珠珠外其他都識，要 keep 住同佢兩個聯絡，今晚重叫左 karen 落中心俾份手信佢，好耐冇見佢係個髮型好似唔同左咁，今年係最後一年玩交流團，出年超齡喇~~~

1月4日 (星期六)

玩左咁多日，而且重有 d 傷風，終於可以襯今日返半日工休息，返到屋企就大訓覺訓到食晚飯，抖夠。

1月5日 (星期日)

今日同肥健出街買野，大家既目標一致，要買鞋過年，行左成日終於大家都買到心頭好，之後去左一間叫南瓜屋既餐廳食飯，佢果個芝士南瓜焗飯好好食，值得再試。

1月6日 (星期一)

今日天氣唔知做乜，放工果陣好大風，重落大雨，好似打風咁，加上天氣又凍，簡直係惡劣既天氣，快 d 暖返就好喇。

1月7日 (星期二)

放工約左人食飯，見未夠鐘就落深水步同旺角幫中心買套碟，原來圖庫既碟咁難搵，行左咁耐得一間有，點解咁少人出真係唔明。之後就去左我好鐘意既台灣舖食飯，今次食佢既魯肉飯，不過都唔及擔擔麵好味。之後行旺角，起潮流特區又見到 d 騎尼野，哈...遲 d 買黎送俾人先。

1月8日 (星期三)

星期日要睇魔戒二部曲，今晚襯有時間睇返第一部曲重溫一下。

1月9日 (星期四)

特首施政報告出左，就如下面幅圖一樣。

1月10日 (星期五)

早上 7 點半，當我熟睡既時候，隻貓原本想走入被窩同我訓，點知佢跳落黎竟然降落起我頭上面，重俾佢 d 爪界左一下，當堂見紅，一路訓一路搵紙巾抹，俾佢激死，而家左邊隻眼好似多左條紅色眼眉咁，唔知會唔會留疤。

1月11日 (星期六)

額頭上面 d 疤好明顯，唔想出街匿起屋企算，起屋企睇左隻叛碟追擊，麥迪文做，不過佢個樣點睇都唔似係個殺手，反而鐘意 d 奸角，好有型。

1月12日 (星期日)

今日係肥健影畢業相既日子，下午約左羊肉同中心果班人去飲茶先，今日出席人數有 8 人，好難得豬扒同好會會董呀 ming 光臨。我地今次夾錢買左個叮噹畢業公仔同埋一束好靚既花俾佢，肥健今日著到成個教書咁既樣，由於百年難得一見，大家見到都嘩一聲，好似見到明星一樣。之後就出發去城門谷公園度影，果度 d 環境都幾好，有花有草重有個人工湖，同肥健影就梗係唔可以太正經，扮埋晒 d 騎尼動作就最好。影到 3 點半就走，之後去睇魔戒 2，今集好多戰爭場面，拍得都幾好睇，不過有 d 人話其實第二集可以唔睇，因為對個劇情影嚮都唔算好大，不過既然睇左第一集就梗係要睇埋之後果 d 先滿足。夜晚去左打冷，好耐冇食，不過今次呢間既食物麻麻，以前試過都唔係咁，可能 10 個人食既關係 d 野食得好快，重好似唔係好夠咁，埋單除返都係 500 蚊，每人 50 都平過打邊爐既。

1月13日 (星期一)

繼應窮之後又一鉅獻，魔戒....

1月14日 (星期二)

雖然哈利上左成 4 個禮物禮拜，今晚終於有機會去睇，原本諗住做左咁耐都冇乜人睇，不過竟然差唔多爆滿，如來重有咁多人未睇。今集覺得拍得比上集好，冇乜悶場，不過哈利波特真係大過左，連把聲都變埋，聽左都唔多慣，但我都係覺得魔戒好睇 d，可能自己鐘意千軍萬馬既場面。

1月15日 (星期三)

今晚約左打羽毛球，黎既都係打開果班人，今晚我同事原來都 book 左場打波，重起我隔離，真係 0岩，今晚發現左原來人類起利誘之下會爆發出更大既潛能，當 fanny 知道嬴左會有雪糕食戰鬥力當堂提升 50%，而樹春就為左個麥當勞餐直情露出殺人既眼神，不過最後佢都輸左，冇得食。今晚我地重第一次跟足比賽規則咁玩發球權打法，不過覺得唔係太好玩，都係直接得分正 d。

1月16日 (星期四)

星期四晚又到例牌返中心既日子，聽呀 sky 講遲 d 佢開班叫人黎整一個中心網頁，重搵我做顧問，真係唔敢當，睇睇下發現 youthnet 既網頁冇左，入到去就彈左去另一個外個網站，奇怪，不過睇返其實都唔係好多中心有佢自己網頁，就算有都係好耐冇 update，做網頁最慘就係呢樣，做左但因為各種原因冇更新，最後重閂埋陣，雖然我自己呢個都唔敢肯定話可以keep 住 update，但暫時黎講我都冇諗過唔攪，希望可以 keep 到。

1月17日 (星期五)

重有兩個星期就過年，不過睇下發覺自己乜都未整咁，於是放工就去買左 d 油、一塊大既膠地顫，準備同屋企大更新，首先要掉左個唔要既衣櫃，都好重，要呀媽幫手先掉到，個妹都幾多衫，塞到成個衣櫃滿晒，之後再將廳另一個櫃搬入房，再鋪左兩張地顫，然後又將 d 唔要既雜物搬晒出黎，最後就將電腦抬由門口位置推去我張床側邊，攪掂晒之後發覺個廳當堂大左，亦都舒適 d，算叫做原成左 30%，不過重未睇閑油牆同門口果 d，要下個星期攪先得。

1月18日 (星期六)

臨近年尾公司冇乜野做，成日就坐左起度打遊戲機，放工後就返中心幫terri 做義工，起麗城西約體育館度做普及健康運動既活動，參加者得我地班童軍同埋一對公公婆婆，西約其實都幾靚，最衰太遠，如果唔係 book 場打波都幾正。今次我地班幼童軍又表現出佢地精靈活潑既一面，攪攪震最拿手，成日起度走黎走去，都幾難攪，起度就不斷做一 d 舒展筋骨既運動，都唔算好辛苦，如果日日都咁做一定冇腰酸背痛。夜晚就同呀盈食飯，佢話佢早排做完負離子，但我點睇都唔覺佢做左，重要成 600蚊，都唔知係咪俾人搵笨，食完飯就陪佢去睇 mp3 機，睇黎佢都唔係好忍得，最後都忍唔到手買左當係自己新年禮物，不過又真係幾細部，d 聲都唔錯，有 d 重好似張咭咁薄，唔知第時會唔會唔細到睇唔到。

1月19日 (星期日)

今朝成 11 點幾起身，下午要去楊屋道體育館做返尋日做既普健運動既活動，除左參加者唔同外其他都一樣，一樣聽返果 d 野做同一樣既運動，有 d 悶。完左個活動之後就去左 pokka cafe 食 tea，叫左樣叫繽紛嘉年華既甜品，佢話份量係俾 4 人，初初都冇諗過會係點，一黎到當堂嚇左一跳，咁大杯既，大到放一個西瓜上去都得，入面有好多唔同味既雪糕球，cream 重有其他餅乾等等......好好食，d 途人行過都望住佢，我估真係冇乜人叫過，不過要成 128 蚊，5 個人食每人都係 25 蚊左右，食完都覺得好飽，下次可以再試。

睇下杯野幾大

1月20日 (星期一)

放工後去同事屋企幫佢部機清毒，原本打算將佢部機 format，心諗冇 3 個鐘都唔走得，好彩搵到解毒既程式，唔駛 10 分鐘就攪掂，返到屋企其實諗住想執下野，不過最後都係偷懶冇整，星期三下定決心一定要做到。

1月21日 (星期二)

今晚俾肥健捉左出去食飯，例牌又同左佢入機舖，葵芳果間機舖的確多懷舊同埋 d 奇怪 game，玩到肥健唔捨得走，之後去食家鄉雞，試左佢新果款燒烤雞翼，味道都 ok，不過成隻都搽蜜糖，甜左 d，重見到去青遠既老馬同珠珠行過，不過佢又睇我唔到。之後行過葵涌廣場，d 舖頭好多都變左賣翻版碟，冇黎一排就唔同左，我都買左兩隻 game，呢個新年假唔會悶。

1月22日 (星期三)

今晚終於有時間執野，先係油個門框，好快攪掂，之後就到抹野，d 千年殘績真係好難抹，抹完之後連條毛巾都爛埋，不過又真係幾乾淨，星期日又要油埋鐵閘同幅牆，有排攪。

1月23日 (星期四)

夜晚返左中心，terri 返埋今晚就放大假到 2 月中，襯今晚就同佢玩返夠本，放工後先去食糖水，杏花樓隻香蕉船都幾抵食，有 3 個雪糕球。之後就落左 pub 飲野，重教識左呀欣玩骰盎同埋搓媒，不過佢好茅，輸左又唔肯飲酒，重玩埋 d 無聊野，拍 7....拍 9.....玩搖骰仔鬥大，鬥細等等，到走果陣都差唔多成 1 點，又要塔的士返去。

1月24日 (星期五)

今晚難得封塵三俠約到出黎食團年飯，約埋志遠同佢補祝生日，今日封塵三俠正式收志遠為一份子，而家變成 4 個人要改另一個名，不過未諗到，不如叫 F4 都好，哈 ....好耐冇去過元氣食壽司，依然係排晒長龍，不過又真係好食，今次 4 個人一共叫左 38 碟壽司，破唔到紀錄，埋單成 5 百蚊，好充實，之後就去左買野，最後就落麥記食雪糕，肥健打機輸左要請客，剩係食佢個麥旋風好似唔抵，原本諗住去食許留山架嘛，下次一定要屈返佢請多次。

1月25日 (星期六)

下午放工後入中心，終於見到以前起另一間中心做義工果陣識既 kitty，而家竟然調左去路德會，三年冇見冇乜唔同到，將來一定有再同佢合作既機會。之後就同班幼童軍一齊整湯丸，佢地整既湯丸乜野類型都有，有 d 入面有料，有 d 又冇，有大有細，有 d 三角型......其實佢地起埋一齊整都係為左有得玩，外型同味道都唔算太重要，不過都食得落肚既。今日亦都係 fanny 既生日，佢收到好多份禮物，我就送左個會唱生日歌既粟子人公仔，夜晚去打邊爐，以前起楊屋道街巿果邊間酒樓又改左名，不過價錢都係一樣，而且食物都唔錯，因為叫多左食物於是就諗左 d 野黎玩，又玩拍 7，輸左要食左碗上面既食物，好彩都冇輸過，最後又有切生日蛋糕既儀式，fanny 咁又大左一年。

1月26日 (星期日)

今日全又起度執屋，朝早先油左個鐵閘同大門，下午就油牆，廁所，夜晚就換左新既膠地顫，未試過整咁多野，做完連腰骨都痛埋，不過又真係企理左好多，都值得。

1月27日 (星期一)

夜晚食飽飯又執屋，今晚唔算整左好多，剩係油左把風扇同個櫃，洗下個廁所咁，可能尋日著短袖衫冷親，成日猛流鼻水，要食定 d 藥打底，星期五再執埋少少手尾大掃除既工作就完成。

1月28日 (星期二)

今晚同 kc 佢地食飯，帶左我地去尖沙咀一間叫和民既日本餐廳度食，呢間野好多人排隊，6 點半拎左張籌等左成個鐘先到我地，而且長排長有，入面其實都好大間，而且環境都幾舒服，我地叫左好多食物，不過佢地 d 野分量唔算好多，細細碟細細碟咁上，每樣都叫 d 黎食，都好好味道，佢 d pizza 好有特色，細細塊食左都唔覺滯，炸野食都好食，全部都合晒我地既要求，埋單差唔多成 600 蚊，都唔算好平，不過未試過真係可以食下，下次值得再試。

1月29日 (星期三)

返埋今日工就收爐，上完大陸返到屋企都係兩點幾，可以抖下，夜晚返左中心整電腦，放工後就成班人落去荃灣既花巿行下，今晚唔算太多人，不過冇乜野睇，反而流行果 d 用氣壓射上天既火箭，周街都有人玩，聽晚可能行旺角花壚，希望唔好咁迫。

1月30日 (星期四)

正式放農曆年假第一天，點都訓晏 d，11 點收到電話中心部機壞左，點解佢尋日又唔壞，於是又早 d 落出左去，整完後就同個 fd 出荃灣行街食 tea，佢知道我今日生日就送左個手提電視俾我，原本想買件衫過年，不過睇極都冇乜心水，最後決定唔買。夜晚就出旺角同班朋友慶祝生日，而且今晚亦係豬扒同好會既團年聚餐，今晚差唔多所有幹事出席，重收到佢地 d 生日禮物，好多謝佢地，好開心。今晚起幸福樓食，食蛋糕果陣又全場奏起生日歌，重成場都聽到晒，全世界望到晒，有 d 醜，哈........下次生日一定唔黎呢度食。夜晚去行旺角花墟同年宵，今年 d 攤位賣 d 野個個都好有特色，唔似舊年咁檔檔賣 d 野都一樣，差唔多個個都買到心頭好，我就買左個腰包同埋一棵仙人掌，到走果陣差唔多成點，好累，不過點都好過聽日去咁迫既。

1月31日 (星期五)

年廿九，朝早去肥健屋企，佢媽咪俾左一底蘿白糕同埋芋頭糕俾我，每年都麻煩佢，之後又執屋，貼揮春，整埋神位，抹下窗，終於大功告成，咁又過左一年，收左廿幾年利是 lu。