6月

2/6 ( 星期日 )

星期六同日去左創興水上活動中心玩，星期六晚未有水上活動玩住，唯有玩下集體遊戲，UNO、BBQ，果晚 D 蚊好鬼死勁，針到我地成班人死死下，唯獨樹春佢唔俾蚊咬，大家都叫佢做驅蚊人，唔知佢 D 血係咪有毒，難為果班參加者佢地咁犀利可以成晚起出面玩唔駛訓。星期日可以玩水上活動喇，第一次玩水上單車同埋獨木舟，感覺都幾好丫，不過玩完隻手都幾累，而且好似唔夠快咁。出左 CAMP 後去左沙田食 KFC，好耐冇食加上又肚餓，感覺好好食，咁橋今日西田又大減價喎，俾我見到 LEVIS 501 牛仔褲竟然 150 蚊，梗係買條啦，好彩有我個 SIZE。夜晚約埋呀榮、KC、TERRI 同 FANNY佢地起大圍食飯，食飽又去左 FANNY 屋企整機，佢地成家人都好攪鬼、睇電視都可以嘈到 9 唔搭 8 咁樣、多謝晒佢媽咪請我食龍眼又請飲汽水，整到 10 點就走，忙左兩日，眼訓到死要好好休息。

3/6 (星期一)

星期一，呢間公司都唔知做乜鬼，成日發生 D 騎尼事，早上個月公司部冷氣壞左，到而家都未整，今日又到爆水喉，3 分鐘就浸到成間公司濕晒，最慘要我地起度用個垃圾剷剷走 D 水，月頭又多野做喎，真係俾佢激死。

4/6 (星期二)

今日返中心教最後一堂網頁班，暫時星期二都唔駛返中心住喇。襯今日我同西西佢地 BOOK 定暑期既時間表幫手做義工，哈....而家 PLAN 到成個7 月同 8 月既星期日都有活動喇，呢個暑假不愁寂莫。另外幫 KAREN 佢搵左幾份要幫手既活動喇，佢今年既暑假係中心是我家為目標，而且佢又係今年功輔班既導師，佢重忙過我。

5/6 (星期三)

今日俾肥健捉左去睇狙魔特工，本身我都想睇呢套野，不過睇完之後覺得同自己預期有 D 出入。首先原來套片既主角唔係講隻怪獸，而係關於一 D 政治既陰謀，想利用隻怪獸推翻個國王，不過值得一讚入面 D 動作場面都幾好睇，聽講有一個香港既動作指導負責，所以睇落都有 D 似香港既動作片。人物方面 D 男主角好鬼有型，唔通法國人特別型既？但 D 女角好似肥左小小。如果俾分既話我俾 6 個粉啦。(10 個粉滿分)

6/6 (星期四)

一早上左大陸工幹，下午出返黎見時間重早就行左陣街先返公司 (即係蛇王)，行過荃灣千色店，睇下有乜禮物買俾會董呀 MING，因為佢 6 月 8 日生日。想搵 D 同豬有關既野，話晒都係我地豬扒會神聖既人物嘛，但睇來睇來都冇樣 0岩，到最後買左對日本拖鞋，我估個公仔都有 D 襯佢既 ....哈( 因為係龜 )，希望佢鐘意。

7/6 (星期五)

今日又去睇戲喇，睇左套生化危機，本身自己有玩開呢隻 GAME，所以都有 D 情意結，但都唔敢抱太大期望，睇耐左發覺都可以接受，有幾個場面都會俾佢嚇一嚇，但我個 FRIEND 就話好驚，佢本身都好細膽，睇親呢 D 片實搵 D 野遮住隻眼黎睇，今次佢又話好驚喇，重驚過上次睇見鬼，哈.....見到佢咁樣我反而想笑，我都幾衰，今次我俾呢套戲 7 個粉啦。但個結局好似暗示會有續集，我都幾期待。

8/6 (星期六)

今日係偉大既會長生日既好日子，當然我地豬扒同好會既幹事都出黎同佢慶祝啦。今次去左尖沙咀一間叫巴西燒烤既自助餐廳食自助餐，講下間餐廳先，D 食物都唔錯架，而且時不時有 D 侍應拎住一串燒烤或者小菜問你地要唔要試下，我推介佢既椒鹽八爪魚同埋豬頸肉，真係幾好食架。
講返今次呀 ming 生日既野，今年得我、肥健、呀榮、wendy 同佢慶祝，5 個人入面剩係會董讀緊書，証明佢重細啦，其實都過左 20 喇。我今年送左對日式拖鞋俾佢、而 wendy 佢就送左信紙，因為佢都幾鐘意寫信，佢應該 0岩用既。

精彩內容可以睇這裏 http://www.geocities.com/kit911.geo/mingbirthday.htm

9/6 (星期日)

好耐未試過星期日起屋企，一於訓晏 D，11 點起身 (平時都係 8 點半) 成日就起度上網、打機、睇書、訓晏覺、食晚飯、又上網......好似好無聊咁、但我好 ENJOY。間唔中起屋企唔出街都幾正想自己己做乜都得。夜晚無線睇慳鏘集，今集講關於人生既野，一世人勞勞役役，不過最緊要活得精彩，活得開心，我覺得好 0岩。

10/6 (星期一)

非常悶熱既一個星期一，公司部死人冷氣又未整好，又落雨，做到成個人冇晒心機，夜晚去九龍灣教人電腦，攪到成 11 點半先返屋企。路程又遠、冇乜必要真係唔想去。

11/6 (星期二)

朝早又要上大陸工幹，上到工廠果陣都係 12 點幾，今年中國 D 既荔枝又豐收，起羅湖見到 20 蚊有成 5 斤，食到嘔都得，有個工人親戚開荔枝園，以前都去過佢果度摘荔枝，今次佢又送左 D 荔枝俾我食，好甜 D 核又好細粒，唔知呢種係咪叫糯米磁呢。將來有機會再去多次果度摘先。

12/6 (星期三)

放左工俾 FANNY 叫左去幫手派種俾梨木樹 D 獨居老人，其實都唔駛我，不過得佢地 4 個細路女點都有個男仔陪住會安全 D，而且派既方地方又係梨木樹，我又要做埋帶路既角色 (但其實自己都唔係咁熟梨木樹 D 樓。今次行程好短，真係俾個種老人家然後同佢地講聲端五節快樂就走得，好快攪掂。見 D 老人家好開心咁迎接我地有 D 膽心將來我會唔會又好似佢地咁等人黎探訪。

13/6 (星期四)

呢日又係一個月一次既球類活動小組既活動 (來來去去咪剩係得羽毛球同壁球 ) 今次我地玩壁球，4 個人每人打 15 分鐘 D 時間都過得好快。打一場就好熱，壁球既體力消耗確實比羽毛球大得多。之後食晚飯，呀榮講起佢計算過自己 D 儲備最多可以支撐兩個月，睇黎佢真係要開始搵工幫補一下先掂喇。而樹春佢就想一個人暑假去拉撒旅行，而我都係冇乜點變，返工放工努力搵工。

14/6 (星期五)

世事真係好奇妙，原本今日要上大陸，但後來老細又話唔駛上，叫我返轉頭。之後回程途中有間機構叫我去見工，問我下午得唔得，我當然冇問題啦。如果上左大陸就可能聽唔到呢個電話 MISS 左個機會喇。今次見一份文職工作，主要係要識打字，因為係要入資料為主，其他野就可能要出街，搬下抬咁，即係一腳踢，不過聽佢講完之後反而對呢份工好似有少少唔滿意咁，可能同自己想既有 D 唔同啦，不過冇所謂，佢又未話請我，請我先再諗。

15/6 (星期六)

今日係端五節，朝早出左九龍灣同個 friend 食早餐，佢帶我去食一間上海舖頭叫做住家菜，我記得好似係一班明星開的，本身對上海食物其實興趣不大，但今次試過呢間發覺真係幾好食，D 食物冇乜味精，水餃 D 汁又留左起入面一咬就漏晒出黎，D 湯好清，特別佢 D 上海麵，同以前食開果 D 又唔同，感覺冇咁粉。下午約左呀 LO 出旺角行街，不過今次冇乜收獲，想買一件睇中左既衫但去到又冇左。但俾我見到宇多田光第三隻大碟出左，等左咁耐終於出左，遲 d 買先得。

宇多田光第3張專輯 Deep River 6月18全城熱賣

16/5 (星期日)

星期日唔出街，因為星期 6 果日出左太耐，D 老骨頭好似散晒一樣，朝早訓到 1 2 點幾見電視做緊城巿論譠先起身。跟住起屋企上下網，睇下書又訓晏覺，到 5 點鐘俾肥健叫醒落荃灣食飯，去食意粉屋，陰公每人食左 120 蚊，好貴呀，快 D 出糧就好。

17/6 (星期一)

唔知係咪尋日餐意粉屋 D 味精太重，尋晚竟然失眠，成 3 點鐘先訓得著。今日又去見工喇，係街坊工友聯會既文員，由於之前見工見得多，今次都唔抱太大期望去。呢份工既職責同我星期五見果份可以講係一模一樣。感覺好似見緊上次果份一樣。但聽佢講返員工福利真係唔錯，如果佢真係請我就好啦。聽日係 SECOND IN 佢地既主任喇，唔知今次成功率又有幾多。

18/6 (星期二)

今日又去街坊工友聯會 Second in 佢地個呀 HEAD，10 分鐘唔駛就 IN 完，其實今次只係俾佢睇下我個真人，傾返少少野就走得。俾我感覺好似冇乜意思請我咁，不過都算，話時都冇抱太大期望佢會請我，唯有等下次機會。
夜晚返左中心攪電腦，同埋 karen 話佢準備左 D 荔枝俾我地食，返到去發現竟然有兩大袋，唔通兩袋都係佢既。原來有一袋係 TERRI，試過後發覺好似 KAREN 果隻 D 核細 D，但味道大家都差唔多，由於近排個肚仔有 D 唔妥都唔敢食咁多，所以每樣食少少算喇，FANNY 佢地聽日就去日本玩，2300 機票，我都想去呀~~~~~~~

19/6 (星期三)

成日都等緊電話，希望份工有好消息，電話就多，不過都唔係，有電話訪問，推銷等等......但其中一個係我之前見工又係叫我星期五 second in 的，今次去青衣見，但本身對呢份工本身興趣不大，不過既然有咁既機會我都會珍惜，盡力而為啦。

20/6 (星期四)

平平無奇既一天，老細今日終於起香港，佢一起度就特別多野做，越來越唔想見到佢。叫佢快 D 買返部新冷氣佢又起度迴避，真係想焗到我地死為止，變態~~~~

21/6 (星期五)

今日又去左見工，不過今次見既同以前感覺唔同，學到好多野，個主任今次出左兩個處境題要我諗辦法解決，我答既答案同佢所諗既可以話有幾大分別。但佢同我講返個解決問題方法我覺得好有用。足足傾左 45 分鐘咁耐，好少問我以前既工作經驗同埋技能，反而我覺得佢係想請一個除左一般文員要有既技能外重要有一種靈活處事及應變既技巧都同樣咁重要。我知道呢份工都有相當大既壓力，假如佢肯俾呢個機會我我相信會係一個幾大既挑戰。

22/6 (星期六)

好充實既一個星期六，一早要上大陸工幹，8 點鐘出門口，1 點鐘出返黎。之後約左 karen 陪佢買佢外展既野，見重有 D 時間就去左搵呀仙跡岩 BILLY 剪髮。雖然都係剪返以前果個 LOOK 但佢今次同我 JEL 到個頭好誇張，KAREN 話前面睇有 D 似碧咸。剪完後就同 KAREN 出去買野，首先係去左旺角華潤睇泳衣，咁 0岩果日佢又大減價，雖然減左價，但靚果 D 牌子折實都要成 200，好似貴左 D，最後冇買。然後去睇行山鞋，不過 KAREN 對腳細得滯，雖然睇中左一款，好難先搵到一間有佢 SIZE 既舖頭，但總算買到，重要佢買左即刻著住行街習慣下。跟住呀榮同 WENDY 又入黎 JOIN 我地一齊行街，行左去女人街買左兩對行山襪，15 蚊對都幾抵，呀榮又買左頂帽玩艇用。夜晚 6 點鐘肥健 JOIN 埋我地一齊去食晚飯，旺角女人街間泰國餐廳真係幾好食，埋單每人都係 45 蚊。跟住食完又去繼續買野喇，今次 WENDY 要幫屋企同 D 同事買野，KAREN 又要繼續買佢外展既野，就咁樣起旺角行左成 6 個鐘，大家都有收獲，我就係買左支洗頭水，哈......算係買得最騎尼同最少果個。

23/6 (星期日)

原本諗住今日上午起屋企休息一陣然後下午同 WENDY 去旺角睇錶，但肥健又話想去太空館睇套片，於是就 12 點鐘出左門口，同 CONNIE 肥健佢食左 LUNCH 之後 CONNIE 佢話想睇相機於是又起旺角行左陣，佢想買一部比較專業 D 既相機，都差唔多要成 3 至 4 千蚊，原來一部相機可以咁貴。然後又落返尖沙咀睇套叫 AMZEING CAVE 既電影，講兩個女人為左搵 D 稀有既細菌發展醫學而攀山涉水，好佩服佢地為醫學而肯冒咁既生命危險，如果個個人都係咁就好。睇完又出返去旺角睇錶，兩日都起旺角出出入入，不過睇左一陣就走喇，WENDY 話遲 D 先再出過黎睇，今次同星期六唔同，大家乜都冇買就走 ...哈，慳 D 錢好 D，暑假有排駛錢。

24/6 (星期一)

由我買電腦到而家用左 5 年既 MON 呢幾日開始出現問題，特別係今晚用用下無端端識得自動熄左，睇黎都要儲定錢換一個新喇。但呢個 MON 都幾襟用，ACER 出品其實都唔差，如果今次換既話希望換個 LCD，慳位又慳電，不過都幾貴，搵間有得分期既先買，希望佢支持到。

25/6 (星期二)

本身唔係一個足球迷，所以都冇乜點睇世界杯，最多都係留意一下賽果，今晚無線直播南韓對德國，冇乜野做就坐定定睇足 90 分鐘。一路都聽人講南韓好有鬥志打得好好，今次親眼睇完佢地比賽發覺真係一支好好既足球隊，唔係講佢技術方面，而係佢地果種體育精神，雖然落後左人地一球依然好努力咁打到最後一分鐘。雖然最後輸左不過仍然向在場支持既球迷菊躬，而 D 球迷又在場鼓掌一 D 都冇發生唔開心既野，精神可嘉，睇到人地好感動，希望下次佢地有機會更進一步啦。

26/6 (星期三)

今次向大家推介一本漫畫叫做全職獵人(Hunter X Hunter)，作者名叫富堅義博，亦是幽遊白書的作者，我覺得呢本漫畫比前作更加出色，雖然離不開打打殺殺的場面，但描寫人內心同埋捉心理方面亦做得好好，令人有睇完有即刻想追下一集既衝動，如果有機會既話希望你地有時間睇下。

全職獵人

27/6 (星期四)

好耐冇影過貼紙相，突然間個 FRIEND 話想影返張就陪佢影左，兆萬地庫果間貼紙相舖出名多款地方又大，今次去到發覺都冇乜野唔同，依然係放左一部二部貼紙相機，不過由以前既 3 0 蚊加到而家 4 0 蚊，都幾貴，所以都唔係咁覺有好多人幫襯咁，影左出黎發覺同以前果 D 都係差唔多姐，都冇特別靚到，哈 .... 而且今日重發覺而家旺角花園街果堆食雲吞麵既舖頭而家清一色都係 10 蚊碗，加多杯野飲都係 13 蚊，唔怪得咁多人幫襯，不過都係嫌佢細碗左 D 唔夠飽肚。

28/6 (星期五)

等左成兩個月，老細終於肯買部新冷氣返黎喇，果日師父話 3 點鐘黎到，等呀等到 4 點幾先出現，拆舊機裝新機攪到成 9 點鐘先完成，好彩果日有同事肯留起度，如果唔係都唔知邊個看住公司。我個孤寒老細又買左部 B 貨既冷氣機，B 貨即係果 D 有缺陷既貨，好明顯見到部冷氣有一個凹左既位，盒又冇喎。第二朝返到公司即刻開黎用，發覺都 OK 丫，雖然得兩匹半，(以前果部係四匹)，但都叫可以整到成公司都夠涼，以後唔駛焗桑拿喇。

29/6 (星期日)

一個非常炎熱既夏天，我地一班人去左行東龍島，果日氣溫有成 32 度，沿途基本上係冇遮陰既地方，一路乾曬，由碼頭出發上到去山頂果段路都重 OK，不過落山先至慘，行一條半路半樹林既地方，條路兩邊有有 D 樹技、荊棘等等，對於少有行山既 WING 同 TEMPO 黎講可以講係幾艱辛，不過最後都總算完成左，辛苦晒佢地喇，曬足一日明顯黑左，聽日重要去行針山，又要曬過，甩皮都似喇.......

相片可以看 這裏