2003年6月

6月1日 (星期日)

豬扒同好會 6 月份節目多多，第一輪就係交通安全要遵守沙田至大尾督之旅，今次踩既路程冇乜特別，都係沙田至大尾督，不過而家條路整過之後都幾好踩，而且有 d 地方都有警察起度同 d 人講踩單車規則，d 人真係守規則左好多，今日好猛太陽，都幾辛苦，曬到有 d 頭痛，都係冇咁熱玩先好。

6月2日 (星期一)

踩完單車隻腳有 d 累，重好眼訓，休息休息。

6月3日 (星期二)

今日聽到個同事講大陸既工人同街外人打交，而家入左醫院，好似傷得幾嚴重，希望佢冇事。

6月4日 (星期三)

今日係端五節，於是就走左去游龍舟水，地點係赤柱，今日好多人，岸邊都企滿晒人，而且下星期去泰國當係練習一下到時去游水都冇咁失禮，不過都係無功而還，重係未學識，今日遇到兩個小朋友 8 歲同 9 歲，見我起度學游水就起度教我，又借埋浮板俾我用，不過最攪笑係其中一個小朋友話自己帶埋女朋友黎，真係人細鬼大，今日重玩堆沙，堆剩個頭，不過都幾辛苦，又整到成身沙，究竟我幾時先真係可以學識游水 ?

瓦匿發現的生還者

路人甲同路人乙小朋友

6月5日 (星期四)

尋日玩堆沙整到耳仔入面入晒沙，整唔返出黎，好煩。

6月6日 (星期五)

睇報紙見到泰國最近好多罪案，又強姦又打劫，覺得好冇安全感。

6月7日 (星期六)

整機整到夜之後經過深水步原來有間甜品舖幾好食，重成日排晒隊，但起佢隔離條間有間同名既舖頭，d 人話係佢假冒，但一樣咁多人，假都咁好生意，都幾攪笑。

6月8日 (星期日)

今日係偉大既豬扒同好會創辦人 ming 既生日，當然要同佢大肆慶祝，先係去佢鐘意既 k 場唱餐飽，原本係唱到 6 點，全靠 wendy 啟動佢既講價功能，可以唱到 8 點，重屈佢送支香濱俾我地，真係超值，唱 tea k 真係幾平，每人都係幾十蚊，又有得食，抵。之後 join 埋其他人去食飯，途中見返一齊去清遠交流團既朱朱同老馬，老馬黑左好多，個頭又好似公仔麵咁曲晒，差 d 認唔到佢。之後去左 pizza hut 食晚飯，海運大廈果間環境好，侍應服務又一流，抵讚，食野係其次，大家一齊起度吹水，嘻嘻哈哈咁又過左一晚。

6月9日 (星期一)

起屋企睇左套片叫爆醬武林，西片，演員全部唔識，不過套戲幾好笑，拍得好絕，而且又搵晒全男班配音，連女主角都係，可以話佢無離頭，純粹想笑下既話真係可以睇睇。

6月10日 (星期二)

今日聽樹春講返開旅行茶會既得佢同個呀伯，個團 total 得 8 個人參加，咁都可以成團都有，聽講要 join 其他團既人，真係騎尼。

6月11日 (星期三)

出發去泰國之前最後一日起 hk，不過今日 book 左打羽毛球，點都玩埋佢先，原本諗住唔好玩咁激廢腳痛，點知佢地班人又打到咁鬼激烈，野都未執，要拿拿臨執先得。

6月12日 (星期四)

今日係出發去泰國之旅第一日，但我地個團係夜晚 10 點半班機，放工之後出發都冇問題，去到機場果然係加埋我地 5 個人，重有一家係 3 個人，total 8 個，聽左旅行社既職員講解後就自己入閘，連領隊都冇，塔阿聯猶既機，聽人講呢間航空公司唔錯，每張椅都有電視，可以聽歌又可以打機，幾好，去到泰國果陣都成 1 點咁滯，果邊既領隊起機場等緊我地，返到酒店都成 1 點幾，沖埋涼執下野都成 3 點咁滯，無聊果陣睇下電視，d 泰文歌唔知點解聽落好好笑，好似成日都係果幾句不斷重覆咁，聽多幾次真係識背咁滯，起曼谷住一晚聽日就出發去巴堤雅.........

第一日入住既 windsor hotel

6月13日 (星期五)

泰國之行第二日行程，起身食左早餐後第一個去既地方竟然係皮具公司，賣真皮銀包皮帶，冇乜興趣。之後就去到一間賣蛇製品既地方，睇個師父係咁將 d 眼鏡蛇玩黎玩去，好犀利，又見到條幾尺長既大蟒蛇，重有條全球最毒既眼鏡蛇，俾個籠密封住，聽講俾佢 d 毒液噴到隻眼即時會盲，恐佈。睇完蛇之後就出發去泰國夢幻樂園，沿途都係冇山，而且 d 路好長好直，呢 d 係泰國既特色，夢幻樂園係一個同 hk 海洋公園差唔多既遊樂場，雖然大但係排隊玩機動遊戲果 d 又唔駛等好耐，除左高卡車之外其他全部都係免費，有個叫飄雪樂園既地方，入面溫度得負 10 度，入去前要換返件雪褸同埋水鞋，入到去真係好凍，但唔算好大，影下相玩下佢個真雪斜坡就好快出返黎，機動遊戲得幾個，重有一堆動物睇，同 hk 差唔多，有一間叫巨人屋既地方，入到去自己好似變左小矮人，幾得意。玩完之後就塔車入巴堤雅，食左飯之後就係自由 shopping 時間，去左間叫 mike 既 shopping mall，好大既百貨公司，多數都係 hk 人起度買野，咁多間舖頭最多人湧去既係 converse all star 同埋黛安薰既舖頭，牛仔褲都平，其他舖就冇乜人行。買完野就去玩古法按摩，剩係做隻腳都整左成個鐘，最後有招拱撟真係高難度，成個俾佢頂起，好攪笑，呢度附近好多 bar，有 d 外國人同埋衣著性感既女仔起度傾計同埋 ( 交易 )，完左古法按摩已經 12 點幾，返到酒店都成 1 點，第二日既行程就咁完左。

夢幻樂園

6月14日 (星期六)

泰國之旅第三日行程，朝早既目的地係去珊湖島，亦係我地最期待既行程之一，先上快艇坐去玩降落傘先，起一個海上浮台度，初初以為係起海灘度助跑然後起飛，但原來只係起個平台度跑幾下就俾架快艇扯高，都唔算好高，好似吊臘鴨咁，每人 60 蚊。之後就再坐快艇到達珊湖島，果然係陽光與海灘，近沙灘邊拍滿好多快艇同水上電單車，但就唔係好多人黎游水，可能怕曬，我地報左個海底漫步同埋香蕉船黎玩，海底漫步幾得意，帶住個氧氣罩潛入水底，但唔係好深，3-4 米左右，d 水又唔係好清，起度可以玩下珊瑚，餵魚，有隻海蔘好得意，任你點搓點鍊都得，成個過程都係 30 分鐘左右，如果 d 水清 d 同潛深 d 就好。之後就玩香蕉船，感覺......好慢，好似搭巴士咁，一 d 都唔刺激，玩完呢 d 先至正式游水，感覺冇 hk d 海水咁咸，起度掟下飛碟，玩下水咁冇幾耐就要去食飯，得半日玩唔夠盡興。夜晚就去睇人妖 show，個舞台好大好靚，都幾好睇，特別係 d 歌好正，中英日都有，首首經典，d 人妖真係幾似女仔，如果起街見到都未必認得出，但同佢地影相每個要收 8 蚊，有 d 人唔知俾幾個人妖圍住影左咁就幾十，見到好多人中招，影完先知幾攪笑。之後又車左我地去 shopping，行街邊檔同埋商場，買左本大相簿，又買左 d 手信，全部有價講，起碼有 7 折以上，買完之後返酒店，完左今日行程。

巴堤雅海灘

6月15日 (星期日)

今日第四日行程，先出發到老處仔樂園，見到 d 老虎入豬既奶，豬又飲母豬果 d，聽講咁會健康 d，重可以抱老虎仔影相，雖然話佢係 bb 但都幾大隻，重可以現場睇鱷仔出世，好似食雞蛋咁剝佢個殼剪臍帶就得。重有其他動物，好似駱駝...袋鼠仔...馬騮等等。蠍子館有個叫蠍子女王，成身掛滿蠍子，恐佈。然後就去睇大肥豬，叫 jenny，佢識得計數，加減乘除答案唔大過 6 既佢都計到，不過佢最後一次失手，唔知係咪聽錯左。重有豬跑步，冇乜特別....剩係見佢地跑過。睇完呢個就車我地去海味街買手信，成條街賣既野差唔多，但導遊帶我地去果間價錢貴好多，行過隔離舖慳返成半都有，起呢度我地買左好多野，一袋二袋咁走，不過其中有一袋後來發現有蟻，唔要得。之後塔車返曼谷，途中又去參觀珠寶店，呢個公司好大，好靚，但 d 珠寶好貴，最平都要成百幾，有 d 要成幾萬，都冇人買，然後又車我地去睇燕窩，入去企左陣頂唔順就走出去行下，跟住又係 shopping 時間，去世貿中心，同 hk 百貨公司差唔多，反而佢對面既 big C 商場就幾好，好多平野買，今次班女仔又瘋狂 shopping，一人一對鞋，重有其他手信等等，我剩係買左包筷子，晚飯就食火窩，任叫任食，但 d 配菜全部都係一樣。晚飯後就去夜冷巿場，呢度賣 d 野幾有特色，但要行晒真係要一段時間，今次行左都唔知有冇一半，有 d 野起 hk 都見有得買，呢度買平成一半，超值，有機會再黎真係要行晒成個巿集，今日泰國有雷暴，但冇落雨，成晚起度閃電。

老虎仔樂園

6月16日 (星期一)

最後一日行程，冇地方去，自己就去附近行下，但冇乜野睇，諗住買個榴槤返酒店食，但又唔見，之前果團人已經塔早機走左，得返我地同另一家人三個，起機場冇野做就用埋最後 d 泰幣，買左雪糕重有錢剩，唯有拎返 hk，今次飛機餐竟然有紅酒，拎左一支試下，不過好勁，成支火酒咁，飲左一杯就面都紅晒，返到 hk 5 點半，唔知點解好掛住屋企，好彩返去，5 日旅行就咁過左，聽日又要返工 lu。

6月17日 (星期二)

重未收拾好心情工作，而且好累。

6月18日 (星期三)

曬好 d 相，入埋相簿，但海底漫步影果 d 唔係咁好，可能 d 水唔清。

6月19日 (星期四)

晨早未起身屋企隻為食貓劍魷魚絲食 果陣打爛我啤酒節拎返黎既杯，激死。

6月20日 (星期五)

肥健間學校同佢續左約，佢重請食我食左餐飯，恭喜晒。

6月21日 (星期六)

今晚去左釣墨魚，未上船前狂風大驟雨，心諗已經不妙，有成廿幾人黎，但得 5 個真係識，其他都係 fd 帶 fd 黎多，大家唔熟真係各有各玩，有 d 悶，出到海果陣都間唔中有 d 雨，船家話因為今日風大浪大，好難釣到，最後成船人總共釣到三十幾隻，有 20 隻係船家釣到，冇佢既話就慘。

6月22日 (星期日)

睇左隻 vcd 叫 PTU 任達華主演，講一班警察既故事，不過個故仔都幾離譜，真實跟本冇可能，但又拍得幾好睇，有 d 似無間道既 feel。

6月23日 (星期一)

世衛取消香港疫區之名，見到周圍都有慶祝活動，睇黎大家真係舒一口氣。

6月24日 (星期二)

今晚睇左套變型俠醫，本身對佢期望唔大，頭果一個鐘頭講個主角童年 d 野，重未識變身真係有 d 悶，到下半部變身後真係幾好睇，不過都幾誇張，一跳就好似飛左上天咁滯，又刀槍不入，視覺官能真係有晒，睇真 d 佢個樣真係幾似林家楝，如果佢地遲 d 拍套加埋 x-man 蜘蛛俠果 d 入去既片可能重正。

6月25日 (星期三)

呢排好難 book 到場打波，朝早 7 點起身都 book 唔到，估唔到咁多人鐘意打羽毛球。

6月26日 (星期四)

今日返中心見到好耐冇見既 karen 同呀 wing，都冇乜點變，今年佢地重起中心做暑期工，咁又一年。

6月27日 (星期五)

臨近周末又狂風暴雨，希望佢落埋今個星期就好。

6月28日 (星期六)

放工整電腦，原本諗住兩個鐘攪掂點知比想像中覆雜，整左6個鐘，個下午就咁冇左。

6月29日 (星期日)

好耐冇去過旺角同銅鑼灣，好迫好多人，夜晚睇左套黑白森林，都幾好睇，杜汶澤好好笑，但劉青雲咁快死，以為佢係主角添，間間戲院都上千機變，搵呢套黎睇都行左好耐先搵到，遲 d 睇埋千機變睇下佢係咪咁正。

6月30日 (星期一)

聽日係 7 月 1 日，有幾個 fd 都話去遊行，睇黎呢個廿三條真係好多人唔鐘意。