10月

10月1日 (星期二)

深夜由西貢巿出發塔的士去西灣亭準備開始夜行，行行下見到 12 點大家就開始唱國歌慶祝，剩係識唱一兩句，沿途都見到有 d 人起度露營同埋點左個營火起度玩，大約兩個鐘頭後去到我地紮營既地方-- 咸田，個海灘雖然靚，不過周圍都係牛屎，安頓好晒已經成 2 點鐘，見到其他露營既人差唔多去訓我地先去玩，首先 set 個營火，要去周圍執 d 爛木，行完成個灘先得果少少，不過起個廁所發現 5 舊未用過既草紙，拎埋佢地去燒，集齊物資唔理咁多點著佢先，都好順利個火重好靚。yawn 呢個時候就扮起巫師，我地每人諗左一個願望，由佢作法，唔知靈唔靈。之後就用螢光棒玩數字球，玩到差唔多 4 點就到今日既戲肉，打邊爐燒夜，不過發覺廁所竟然冇水洗野，而士多果邊就有好多狗起度吠，攪到我地唔敢過去船長提議我地不如唔好洗，因為本身百佳 d 食物已經洗好先包裝，應該都唔會太污糟，最後就乜都冇洗掟晒入去烚到佢熟就食。好彩大家都冇事，食飽坐起度傾一陣偈差唔多都日出，跟住就行去睇日出，果日好多雲梗係睇唔到，不過個風景都幾靚，坐起度吹海風好舒服。9 點左右執野返出去，去到碼頭坐 20 蚊快艇，5 分鐘就出到巴士站，快過行路成 40 分鐘，不過架快艇真係好快，好驚佢拋左我落海。搭巴士出到鑽石山諗住去飲茶，不過太多人冇等，去左付近美食廣場食就返屋企，返到屋企成 1 點咁滯，涼都冇沖就撻落床訓，4 點半起身沖涼換衫約左呀盈睇一碌蔗，呢套戲本身對佢冇好大期望，不過睇落又發覺都唔差，雖然我唔知佢其實想表達乜野，不過拍得好溫馨幾浪漫，黃秋生亦都佔好重戲份，做得都唔錯。睇完戲食左飯呀盈話我隻眼好唔掂不如早 d 返屋企休息，最後冇去行街就返屋企，呢兩日真係玩到謝晒，但又好開心，值得既。

老人與海

10月2日 (星期三)

睇左套電影 <愛，回家>講一個婆婆同佢個孫之間的故事，個婆婆做得好好，見到佢就覺得佢好可憐，有個咁頑皮既孫不過又咁錫佢，開頭見到個小朋友咁頑皮真係睇到有 d 嬲，當然後來都係婆婆做左 d 感動個孫既事令佢改變啦，唔知自己將來老左會唔會好似佢咁好彩，有個咁乖既孫。

10月3日 (星期四)

起呢間公司做左咁耐，到今時今日先至要買第一部電腦，由於中國海關要求出口商每次出貨都要出一封電腦列印出黎既証明信俾佢地，老細終於要起不情願之下拎錢出黎買，不過佢用部電腦都剩係用黎打字，所以有個同事話讓佢部舊機出黎，不過條件係要用個新芒交換，老細都冇乜所謂應承，遲 d 要去同事屋企 check 下佢部機究竟 0岩唔 0岩用。

10月5日 (星期六)

放工上左同事屋企 check 機，睇下佢部機 0岩唔 0岩公司用，其實部機都好夠用，係亂左 d，同佢 format 完再裝返 d 野，100% 冇問題，遲 d 可以拎返公司用。之後原本諗住去剪一剪頭髮，不過 tempo 同呀榮叫我去食 tea，於是唯有遲 d 先去攪，食到 5 點半就走，去樹春屋企整佢部超級電腦，佢部機果然超級，由 7 點整到成 11 點先攪掂，最緊要整到佢可以打到機，整完之後就落街食晚飯...( 其實叫食燒夜就差唔多)，食飽返到屋企都成 12 點半，好鬼累，聽日重要去南丫島，要頂住.....。

10月6日 (星期日)

成日都話要去南丫島，去左幾次都去唔到，今日終於了結左我心願去得成，去到中環食 KFC，入到去以為去左菲律賓 KFC，搵一個中國人都冇，我地好似異族咁。食飽搭船出發去南丫島，落船感覺同去長洲冇乜分別，行入 d 見到有好多海鮮舖，有間重同我地講話唔好食唔收錢，我都好想試返次。行前小小 KC 話有檔山水豆腐花好正，我地坐低起度試，果然好凍好滑，重買左 D 茶果試，幾好味，而且食落冇普通茶果滯肚既感覺，食完繼續我地既行程，沿途有好多買小飾物同食物既舖頭，重有一間廟，自己求完簽可以拎返自己簽文去睇，每張簽文 2 蚊。之後沿住條行山徑一路行去到海灘，去到換埋衫去游水，今日冇乜太陽 d 海水都幾凍，不過 d 水好淺，行到好出都浸唔過頭，有陣時重見到 d 魚起身邊游過，玩到差唔多 4 點幾上水執野準備回程，見重有時間就周圍行下，附近有好多舖頭都係賣自己 d 手工藝，都幾靚同睇得出有 d 心思，有 d 外國人坐起度飲野傾計咁，睇佢地好寫意。沿途見到有人賣煨蕃薯同炒粟子，我地又買黎食，好耐冇食過，好好味，最後塔 5 點半班船出去，完左今日既南丫島之旅，不過值得再黎多次，有好多野都冇細心咁睇過。夜晚出返去旺角睇戲，由於其他人要睇愛回家，我同 kc 已經睇左，於是分兩批人，我同 kc 睇末路驕陽，其他人睇愛回家，末路驕陽都 ok，冇想像中咁悶。睇完戲就落旺角食飯，又去金太朗，叫左好多野食，食到飽飽先走，睇下個鐘成 11 點，出左街成 12 個小時，不過計埋都係用左 200 蚊左右，都抵玩。

山水豆腐花

風箏一隻 15 蚊 (不連人)

10月6日 (星期一)

放工去左深水步黃金幫個同事睇電腦，呢排 d 電腦配件好似升左價，果陣同 miko 砌果部好似都冇咁貴，順便幫公司睇埋 printer 同芒，睇完搵左個 fd 落旺角食飯，試左間泰國餐廳，味道 ok 不過價錢都唔平，兩個埋單二百元，都係鐘意去女人街果間度食，又平又好味。

10月7日 (星期二)

之前幾日成日出街，今日點都要返屋企抖下，原本諗過剪髮，不過都係返屋企抖下舒服 d，遲 d 先剪。食飽飯就上床訓覺，隻貓都覺得天氣涼左，走入張被同我一齊訓，沖完涼之後勁流鼻水，唔知係傷風定鼻敏感，天氣一轉就唔多妥，麻煩。

10月8日 (星期三)

下午同事話買電腦，見公司都冇乜野做就 3 點幾同佢蛇左出去，( 當然老細唔知 )，同事原本諗住買部機再加一個普通芒就算，不過佢見到 d LCD 芒又心郁郁想換，逐間去睇晒最後幫佢執左部 3600 有找既機，夠晒佢用，然後佢都抵受唔住誘惑買左個 LCD 芒，然後幫公司買埋個PRINTER 後就塔車返去。返公司放低部機後就去同事屋企幫佢整，7 點鐘整，成 11 點先走得，足足 4 個鐘，飯都冇食，返到屋企樓下買左碗車仔麵同兩串燒牛肉，都係第一次試，牛肉串幾好食喎，真係即叫即燒，好味。

10月9日 (星期四)

最近聽到自己朋友對自己其他朋友的一些不滿說話，雖然只係小小不滿的說話，不過自己聽到覺得又唔係好舒服咁，話晒大家都係自己既朋友，聽到都唔唔知講唔講返俾當事人聽好，唔講佢又可能唔知自己有乜唔妥，講又驚佢地會關係更惡法，都係做返個沉默既聆聽者算。

10月10日 (星期五)

唔知呢排係咪行運，近來都發生左好多開心事，可能自己杞人憂天，總覺得遲 d 會有 d 唔開心既事發生，希望係錯覺啦。

10月11日 (星期六)

尋日先話唔知會唔會當黑，今日就真係中招，話說今日去幫 TEMPO 整部電腦，心諗都係重裝 WINDOWS 應該冇乜問題，今日同埋呀榮去，由於 5 點鐘要返中心帶一個活動，中途整整下就俾呀榮頂手諗住應該冇問題，點知事與願違，3 個鐘頭後睇返.....呀榮竟然裝到有一半既硬碟空間唔見左，以前都未發生過 D 咁既事，一時間都諗唔到方法解決，到最後唯有將個問題暫時保留，我要返去搵下有冇計，TEMPO 重請左我地食 PIZZA 添，真唔好意思，一定同你搵返果 28G 出黎。

10月12日 (星期日)

今日去左行針山，以前都去過一次，今次再去印象更加深刻，雖然自己就住起城門水塘附近，不過真係好少上去，可能明天係重陽節假期關係，好多人都去行山，城門水塘其實都好靚，今次由城門水塘行上針山，其實都唔算辛苦，係要一次過行一段好高既路果段辛苦 d，我記得果次夏天行真係成身濕晒，今日又冇乜太陽，不過都係焗左少少，eva 今日又有 d 唔舒服，好彩都可以順利行晒。山頂好靚，可以睇到沙田同葵涌既景。起山頂抖左一段時間後就開始落山，落山條路都好悶，附近都係得 d 樹，不過唔知點解今日咁多馬騮周圍走，真係唔驚人，重起度摷 d 垃圾桶，只係怪 d 人成日餵佢地。落返去城門水塘見到今日好多人起度 BBQ，連警察都上埋黎封路唔俾車入，出返荃灣後就食野，夜晚澳門個 FRIEND 潔雅同佢朋友黎左 HK，陪佢地去旺角中心買野，之前見到佢地已經一袋二袋，起入面重可以係咁買，女仔 D SHOPPING 能力真係嚇死人，聽講佢地每人今次都起 HK 買左成 1000 蚊野，唔通 HK 野真係咁抵 ?

帶動香港經濟既澳門人

10月14日 (星期一)

今日重陽節假期，尋晚 icq d 朋友可能因為今日假期，傾計傾到成 2 點半都未走，都好耐冇試過。今日因為要拜神，11 點起左身，開左電腦又係見返尋晚傾計果 d 人，傾左一陣因為都重係眼訓就去訓晏覺，下午肥健叫左出去荃灣行街，佢今日買左好多野，又買衫又買褸，重起吉之島十蚊檔買左個煲同埋個鑊仔，不過呢個 10 蚊店真係幾攪鬼，乜都有得買，不過有 d 睇落又唔值，如果真係有心買野可能執到寶都未定。

10月15日 (星期二)

放工同中心班職員去打羽毛球，今次我地屬於高級組比賽，個個都係打得之人，呀欣由於比較少打，所以打得比較辛苦，不過今次教左佢一招拗柴絕招，佢學得好快，次次都用呢招拎分，哈.....遲 d 應該有 d 威脅，由於今晚係咁打冇停過，睇黎聽日都幾累。

10月16日 (星期三)

唔知係咪尋日食左 d 唔乾淨定係今朝食既早餐有問題，今日就肚痛，塔塔下車特如其來劇痛，好彩去完洗手間就冇乜事，夜晚去左表姐屋企，例牌又係咁俾野我食，次次都食到飽晒咁出門口，臨走前重俾左個梨叫我出去食，唔怪得佢老公同個女咁健康。

10月18日 (星期五)

肥健抽到睹船既免費飛，我同佢都未去過，於是就上去睇下，開頭諗住唔會剩係睹咁悶，應該都有其他野可以玩下，剩係上去食佢三餐都抵，5 點半起皇后碼頭集合，不過成 6點半先有船轉駁過去我地今次我地既睹船，船名叫金公主號，架船都好大架，上到去重要做登記同出境既手續，7 點食第一輪晚餐，d 食物都幾豐富，味道都唔差，同一般自助餐差唔多，由於正式活動都係 9 點鐘開始，見有 d 時間就返入去房坐下，間房都算乾淨，不過又冇電視，真係剩係用黎訓覺就唔知做乜好。安頓好晒之後就去睇下究竟呢架船有乜玩，首先落去佢所謂既電影院睇下，起船既最底層，入到去聞到一陣好似電油咁既味，可能太近機房，重要係做美女與野獸，冇乜興趣望兩望就調頭走。第二、三層剩係得 d 住客房冇乜野玩，第四層就係餐廳、睹場同歌舞廳，重有間遊戲機室，不過得 6 部遊戲機，重要係得一部我鐘意玩，9 點鐘架船出到公海，睹場開放，呢架船好多乘客都係國內既人，睇佢地都係志在黎睹錢，自己未玩過老虎機，於是就每人夾左 20 蚊去玩，跟據我地實戰經驗，每入左 3 0 蚊就會嬴返 10 蚊，最後當然全軍覆沒，輸晒。行入 d 睹場就見人地玩百家樂，見成班人圍住張抬買，300 蚊一局最起碼，完全唔知佢地做乜，睇左陣就走。之後就繼續向上行，見到有卡拉 ok 房，麻雀房、按摩室等，全部要錢，上到第 8 層有個閱覽室，可以起度睇下雜誌同報紙，再上一層就係船既夾板，好大，吹住海風好舒服，如果唔多雲就可以睇埋星。行完成架船發覺真係冇乜野玩，返入房傾下計沖過涼，再休息一陣等食燒夜，燒夜時間由 1 1 點半開始中式食物為主，唔錯丫，幾新鮮，我都食左好多野，肥健見到燒買就係咁食，食左 20 粒都有，重叫左支啤酒飲，我就鐘意食佢 d 粥同雞翼。食飽見冇乜好做就返房，又冇帶野入黎玩，真係悶到想死，估唔到真係冇乜好玩，起船傾多陣偈就訓覺，好似重早過平時起屋企訓，待續........

肥健私人內褲

架船有幾長......

餐廳

10月19日 (星期六)

朝早 7 點起身執埋野去食早餐，8 點 3 架船出返去尖沙咀落船，結束左今次睹船之旅，不過下次真係唔會再黎，或者叫多 d 人先，起碼可以起間房玩當去 camp。今日報紙頭版都係講羅文逝世，一代歌王離開相信都好多人唔開心。下午要跟中心去一個 camp，地點係大嶼山望東灣，今次參加者全部都係小朋友，好多我都認得，佢地都參加左好多次。由荃灣出發，去到青衣再轉地鐵，最後由東通轉巴士入去，落左車後要由貝澳行大約 45 分鐘就到望東灣青年旅舍，由於今次 bbq 同埋 wild camp 要揹好多野，雖然路程唔長不過都幾辛苦，入到去已經 6 點鐘，呢個 camp site d 草地唔知點解遍佈草猛、壁虎、小強同埋蚊，不過 d 小朋友見到佢地就好開心，係咁起度乜都捉黎玩。set 好營就開始準備 bbq，今晚唔算好熱 bbq 都幾舒服，小朋友最鐘意食腸仔，每個都食成 4-5 條，最唔受歡迎係扒類，冇乜點郁過。燒完野食就落海灘玩一陣集體遊戲，佢地起海灘見到蟹又好開心起度係咁捉，最後我幫佢地改左個名叫捉蟲專家，返到營舍俾佢地自由活動，小朋友又繼續佢地既捕獵昆蟲行動，有 d 就玩 UNO 或者傾偈，我地今晚教左佢地玩幾個玩死人既遊戲，分別係 (上山落山、喵喵喵喵喵、open or close、)小朋友諗到頭爆都諗唔到點解，不過有一兩個都幾聰明，最後都俾佢諗到。到一點我同呀榮就返入營訓先，不過都訓得唔好，因為都幾焗，而且小朋友幾嘈，成 4 點幾都未訓，7 點鐘起身又聽到佢地起身玩既聲，小朋友精力果然旺盛，早餐之後玩左一陣集體遊戲就開始收野落貝澳泳灘，今日見到唔係好多人起呢度露營，我地就起呢度午餐，俾佢地玩多陣就開始回程，回程途中發生左 d 攪笑野，原來我地一直俾人跟蹤，話說原來我地起上車、回程、到塔地鐵都係有一班人坐起我地後面，佢地唔講我地都唔知，班小朋友重同佢地玩返上山落山同問佢地 IQ 題，小朋友既智慧今次嬴左佢地，哈 ...聽到班大姐姐既問題問到一半就俾人答到都幾好笑，返到中心重要洗營同做清潔，做晒所有野都成 3 點，佢地異口同聲話下次咪攪，哈 .... 以前又係佢地話要攪 wild camp，而家又話辛苦，冇你地符。

泳灘與參加者們

10月21日 (星期一)

連續玩左三日，今晚點都要起屋企抖返夠本，放工返屋企即刻要訓陣，到 7 點幾訓醒食晚飯，之後睇左套 vcd 再上網，玩到 1 點先訓覺，呢個就係我休息既定義，爽....。

10月22日 (星期二)

聽朋友講尖沙咀有間食甜品 buffet 係好正，成日都冇機會去，今晚終於可以一試，之前去拎定籌，6 點半就正式開始，見到好多蛋糕，好正呀....梗係每樣都叫 d 黎試，重有其他意粉、pizza 同飯類，不過意粉果 d 味道真係一般，我地叫左個 pizza 重煎到成個底濃晒要退返俾佢，而蛋糕其實都唔差，始終係佢地既招牌菜，我地 4 個人差唔多食左 12 件蛋糕，計返佢如果 22 蚊一件既話就食左成 260 蚊，意粉又食左 5 碟，計返又 150 蚊，飲品同其他，計埋又 100 蚊，即係 total 食左佢 500 蚊左右，而今次收費就每人 110，賺左佢幾十蚊。不過呢間野 d 服務態度真係麻麻，叫佢換個碟 pizza 又話我地食剩野要 charge，要個高級 d 既黎睇下先至得，食既時間又唔夠，得個半鐘，有半個鐘就係要出去排隊拎野食，實際得一個鐘時間，都幾趕，如可以靜靜地咁坐一段時間慢慢食相信會重正。

10月23日 (星期三)

今晚要返中心同 sky 重有 karen 傾下星期 5 禁毒 show 做司儀既野，睇下份司儀稿發覺都唔短，有好多野講，同 karen 排果陣大家都夾得幾好，希望到時唔好出事。不過衣著方面都唔知點好，佢又話最好著恤衫，但我剩係得格仔恤，連 tie 都冇條，希望真係唔好著得咁隆，每好唔慣，今日呀欣話統一果隻芒果布甸好正，好味到震咁話，試左一個發覺都唔差，sky 重買左 9 杯返黎，大家臨走前食埋先，好鬼開心。

10月24日 (星期四)

最近 fanny 買左部新既電腦，今日上去幫佢執返齊 d 軟件同裝返塊手寫版，廠機果然與別不同，裝左好多垃圾起度，有 d 直頭係多餘，不過可能係乜都原裝啦，同我地呢 d 用翻版既人唔同，如果有機會一定剷晒佢重裝過。夜晚裝完後樹春就入黎沙田搵我地食飯，佢都真係幾得閑，由青衣特登入到黎，食飽又搭車返屋企，都唔知為乜。

10月25日 (星期五)

今晚幫中心有份攪既戒毒 show 做司儀，我既拍檔係 karen，雖然我地兩個都有做過司儀既經驗，不過都難免會有 d 緊張，而且今次主辦單位包括埋荃灣區議會，聽落好似好隆重咁，臨開場前我同 karen 重起化粧間練多一次對白，發覺重多左 d 位講錯，不過都就開場唯有頂硬上。今晚既觀眾同大會預期既差好多，原本 300 個位最後得幾十人出席，可能係宣傳不足掛。到我地講野果段時間，基本上冇乜問題，不過始終有幾句係講得唔好，到節目既一半時間基本上都唔駛司儀出場，因為王 sir 已經講晒我地要講既對白，而我地就起後台傾下計，講下笑咁，不過唔知點解好肚餓，腳又累，行山都冇咁辛苦，最後我地只係講左幾句致謝詞就完左呢個show。

10月26日 (星期六)

wendy 星期一要飛去美國考試，不過佢手頭上公司俾佢用既 notebook 又冇 cd rom，於是就同佢出深水步睇，開頭睇左幾間佢都話冇，只係得連埋燒碟功能既 cdrw，心諗大件事，唔通冇，不過之後行多幾間又見到其實好多舖頭都有，不過價錢都好參差，最貴同最平差成 100 蚊都有，之後再行埋去鴨寮街睇，有 d 人見到我地拎住部 notebook 已為我地拎去賣，係咁叫停我地，行返轉頭又嗌過，攪到我地雞咁腳走。到最後都係去返黃金以 540 蚊交易，之後買完就拿拿臨走去西九龍廣場試裝，得左，不過由於佢公司部 notebook set 左權限唔俾裝軟件，到最後 run 到隻 cd 又裝唔到軟件，激到 wendy 彈起咁滯，不過都冇法，唔買都買左，希望佢今次過去美國順順利利考好個試啦。計返今日都用左好多錢，買左 50 隻 cdr，再加一隻 cdrw，另外又買左 d 軟件同 game，夾埋都用左 300蚊，玩電腦真係奢侈。

10月27日 (星期日)

原本今日既行程安排得好密，首先朝早同呀欣帶一個 day camp，地點曹公潭戶外康樂營，今次由於帶家庭，基本上都冇乜野做，家長都係帶晒 d 小朋友自己去玩就 ok，我同呀欣見得閑就去左打壁球、卓球、之後又去左睇電視，食埋午飯飯氣攻心重扒起張抬度訓左陣，未試過帶 camp 帶得咁舒服。之後夜晚原本諗住去海洋公園玩，點知有 d 人又臨時話唔去，最後決定取消，有少少失望，夜 d 就出黎食左 KFC 再行陣街就算，不過竟然起荃灣無端端執到 20 蚊紙一張，4 個人分每人都有 5 蚊，於是就去麥記每人食杯新地就用左佢，經過大家研究相信係賣老翻 d 人跌左既，即係我地洗緊黑錢，哈....食左杯雪糕唔知會唔會俾人尋仇。

10月28日 (星期一)

食飽冇野做，將人地俾果部電腦拆散再重組，出奇地又整得返，見自己部機都幾殘順便幫佢 format，咁又攪左成晚。

10月29日 (星期二)

可能最近食左太多熱氣野，d 牙肉開始唔妥，要飲涼茶先得。

10月30日 (星期三)

今日聽天氣報告講話星期日可能得返 20 度，下週初得返 10 幾度，終於要拎返 d 冬季衫出黎先得。