2003年10月

10月1日 (星期三)

起未日出既時間大家又坐起山頂上面又食又抖，呀倫小吉佢地係咁起度周圍影，到 6 點左右天開始光，終於見到日出，好靚既一個咸蛋簧，咁辛苦上到黎都係值得，不過原來山頂有好多烏蠅，咁高都有真係奇怪，起度坐下玩下影埋相 7 點幾左右開始落山，正所謂上山容易落山難，落山段路對部分人黎講真係好辛苦，要花一段時間先可以落到黎，去到赤徑搭船出返去黃石碼頭再轉巴士出返九龍，食左少少野之後即刻塔車返屋企抖，但自己覺個行呢個山冇想像中咁難，或者下次可以由另一條路上都 ok。返到屋企涼都冇沖就訓，正到 5 點起身沖涼出門口去麻甩佬聚會，何伯今日開始加入失業大軍，佢話要抖抖，唔知幾時先搵返野做，去左肥健成日推介話正既一間日本餐廳食飯，叫銀菱，試過之後又真係唔錯，而且價錢又不平，諗住 4 個人應該要 600 蚊埋單點知 400 就可以，真係好抵食，三文魚剌身最抵食，壽司都唔錯，即叫即整，將來食飯又多個選擇。晚飯後起街行左陣又去麥記食雪糕，又攪到成 11 點幾先走，聽日隻腳都唔知點算。

10月2日 (星期四)

隻腳出乎意料冇乜事，不過真係好累，今日亦係值得紀念既一日，終於甩難。

10月3日 (星期五)

今晚睇左無間道，冇第一集咁緊湊，但整體上都 ok，主要睇三大影帝做戲，同魔戒一樣要睇埋第三集先至叫完美。

10月4日 (星期六)

重陽節正日，一早起身拜完神就約左小吉佢地去塔門露營，今日入西貢既人非常多，行山露營燒野食乜都有，食左 lunch 再去買埋野就出發，入到黃石碼頭再坐大船去塔門，中途見到有山火，而且火頭有兩個，d 直升機疲於奔命，入到塔門都成 5 點，想搵個地方 set 好野先，見到個球場中間有個大水桶，原來係直升機用黎夠火既水洞，容量有成 600 加倫，而且重見架直升機返過黎拎水，拿拿臨第一時間拎部相機拍低，起佢飛過頭頂果陣真係好似打風一樣，吹到周圍亂晒，亦都引左成班人黎睇，算係今次一件有趣事。set 好營之後就起附近行下，爬下 d 奇形怪狀既石頭，海面好大風，d 浪中打得幾高下，玩左陣就返去開始整野食，今晚我地打邊爐，呢個天氣食就最爽，最攪笑係買左 d 紅腸，落晒去煲之後成個湯變左紅色，地獄拉麵一樣，好好笑。食飽坐下就開始玩 uno，以 20 舖為限，最高分兩個輸左請飲野就係懲罰，世事難料，最後兩個輪家係 terri 同呀基，聽朝有野飲，玩完成 2 點，返入營訓覺。

10月5日 (星期日)

訓醒已經 9 點，唔記得塔門可以睇日出，錯過左個機會，好彩小吉佢都影左幾張相俾我地睇，食左早餐後就起度玩風箏，星期日好多香港團果 d 人黎到，每團都成幾十人，一時間變得熱鬧左，之後執野周圍行下睇下。差唔多 2 點幾先塔船出返西貢，好耐未試過去露營去得咁舒服，又唔駛點行，又可以訓晏 d，環境都唔差，一個露營好地方。

10月6日 (星期一)

玩夠，休息一天。

10月7日 (星期二)

可能秋天既關係，一冇野做就好易訓著，個人特別累。雖然重有兩個月先到 04 年，但已經有來年運程，詳情請看 這裏

10月8日 (星期三)

今日大 fanny 同佢個 friend 黎打羽毛球，真係真人不露相，兩個都有返咁上下，之後佢地早走，變左 4 個人，打完腰都痛。

10月9日 (星期四)

鄰居又俾人起牆寫晒字追債，已經第二次，最慘佢 d 屋企人，唔關事都受影響。

10月10日 (星期五)

冇入屯門一排，周圍整路整到唔認得咁滯，夜晚開始落大雨，下星期又話轉涼，終於可以換長袖衫。

10月11日 (星期六)

原本諗住今晚去海洋公園玩鬼屋，點知又撞正落大雨，要取消。

10月11日 (星期日)

今日六壯士去行蓮花澗，之前聽人講話好易行，路程又短好快行晒，諗住可以輕輕鬆鬆咁完成，點知比想像中難行得多，由起點出發一路都見到水流好急，可能尋晚落過雨關係，水位亦都高左，一路行一路要扶住石頭，中間條澗水太深好少機會行到，一味起側邊好似爬山咁爬過去，中途唔知俾乜野拮到，成隻手又痛又痺，過左成 10 分鐘先冇事，由於我地行得較快，12 點半已經行左一半，去到其中一個景點蓮台飛渡黎過大休，呢度似一個大泳池，有條瀑布仔，呀 tim 佢地已經急不及待換晒泳衣落水，重做埋晒 d 好嘔心既 post，呢個時候發覺自己對行山鞋既底好似唐老鴨個咀咁有一半拗開左，但都冇法....希望佢捱到。佢地游水既時候我地就起度煮野食，非常豐富既午餐，有 5 包公仔麵...香腸、獅子狗卷、餃子、重有朱古力沖劑，成班人就好似深山野人咁食野，由於食物太多既關係最後 d 餃子食剩一半要打包返屋企。起度抖左成個幾鐘，往蓮花走廊出發，依然係一路爬住咁行，手腳都俾樹枝刮花幾次，雖然條澗幾靚，但真係冇乜心情去欣賞，只想盡快行完，途中經過潘龍飛瀑 total 行左個半鐘頭終於去到終點主瀑，唔係好知佢叫乜名，一個大水池，起呢度終於見到有人，成 10 幾人起度煮野食傾計，有大有細，真正既 family day，重問我地食唔食糖水，好 nice，呢個時條我對行山鞋已經好似 file 咁，個頭得返少少未甩出黎，好醜樣重俾人笑，唯有扯開緊連既部分行返出深井先買拖鞋換，今次行山代價真大，好彩冇叫平時少行果 d 人黎，唔係真係害左佢。

蓮台飛渡

10月12日 (星期一)

好耐冇上過 fanny 屋企，今日去佢屋企度整機，佢媽咪又親自下廚煮左餐晚飯招待我，麻煩晒。

10月14日 (星期二)

今日涼左好多，連隻貓都走入張被度同我訓，好耐冇試過。

10月15日 (星期三)

諗住快快趣整好人地部機可以行街，點知越整就越壞，真係扯火，又攪到成 12 點。

10月16日 (星期四)

今晚幫人整完電腦後就打邊爐，計計埋埋呢個月已經打左 3 次，不過打邊爐我又唔會厭，係熱氣左 D，要飲下 D 涼茶下火先得。

10月17日 (星期五)

今晚風塵三俠返到已前讀書學校附近間金溪酒樓食飯，起度懷緬一番，畢業之後都冇返過黎咁滯，冇乜唔同，見到 D 師弟師妹起條街行過都有少少懷念，如果我地三個重著住件校服起街行都幾攪笑。3 個人叫左成 6 個菜，又飲埋啤酒，飲完面都紅埋，如果可以約多幾個舊同學一齊就更正。

10月18日 (星期六)

今日同中心班童軍仔去左太空館同科學館，起太空館睇左套影片，講火箭同太空人既歷史，可能因為早排中國太空人成功升空而播，都幾好睇，但班童軍仔掛住玩多過睇，失禮，展覽廳多左好多體感遊戲，好多都有高度限制，小朋友未必玩到。之後到科學館，都唔記得對上果次黎係幾時，總之好耐之前，好似同我第一次黎差唔多咁，係多左個電腦室，冇乜點變，不過唔駛入場費就冇乜所謂。

10月19日 (星期日)

今日幫 ralph 間中心帶班小朋友去新娘潭行石澗，由於吸收左上個禮拜行到鞋都爛埋既經驗，今日執多對拖鞋以策安全，呢條澗比我上次去果條易行得多，d 水唔算太高，小朋友都可以行得幾輕鬆，未到一點已經可以食 lunch，今次我地又同上次一樣打邊爐，食物唔敢買咁多，怕又食唔晒，呀榮今次有 3 個朋友黎幫手，言談間竟然發現其中一個係中學既師妹，不過我都早佢 5 年畢業，聽佢講返而家間中學 d 野，彈多過讚。新娘潭呢條澗真係好舒服，坐左起度耐左真係唔捨得再郁，行多一個鐘左右就塔車出返大埔，佢地提議不如去元朗一間幾出名既日本野食飯，入到去雖然 6 點半，但已經見有一班人等緊，等左成個鐘先有位，重要限時 45分鐘要埋單，不過佢 d 野真係幾好食，d 魚生好大塊，重叫左天婦羅、魚生果 d，不過冇叫壽司，食完後大家又去試元朗果間雄記甜品，上次冇食榴槤 pancake，今次終於可以試，都唔錯，陣味又唔算好大，起度傾下計傾到 9 點左右就走，好充實既一日。

10月20日 (星期一)

玩左幾日，d 累氣開始出現，要休息。

10月21日 (星期二)

一段時間冇去過鴨寮街，而家入面真係乜都有得賣，連賣電鑽既舖頭都有幾間，不過唔知呢 d 係咪賊贓，之後起旺角買左張露營用摺椅，第時唔駛坐起地。

10月22日 (星期三)

又做左錯誤決定，衰心急，呢次真捉虫。

10月23日 (星期四)

今日心情麻麻，而且又聽左 d 自己冇興趣又人地唔如意既野，慘~~

10月24日 (星期五)

星期六攪果個秋季 bbq 活動，好似維港群星匯一樣，問題多多，話黎又唔黎既又有、問左又唔覆既都有。

10月25日 (星期六)

今晚同中心班朋友 bbq，地點係城門水塘，由於怕冇爐既關係所以 3 點幾已經走去霸位，不過去到都冇想像中咁嚴重，係 d 近廁所既位置俾人坐晒，其他地方都大把爐，由於差唔多要成 7 點先至人齊，呢兩三個鐘就起度玩啤牌，到 5 點幾第二輪班人到達，開始洗食物，包錫紙，7 點左右人齊正式整野食，由於帶黎既 gas 燈唔夠氣，用用下就冇燈，好彩都有電筒果 d，不過都唔係好夠光，成晚都係黑麻麻咁燒野食，原本諗住玩 uno 都玩唔到，同平常一樣，總會食剩野，起度玩下又燒下，差唔多成 12 點先走，之後起水壩附近睇左陣星先返屋企，不過都係鐘意日頭燒，時間多 d 又可以玩下其他野，黑麻麻實在麻煩左 d。

10月26日 (星期日)

今日下午幫中心做完義工，夜晚去左 kc 屋企打麻雀，重叫左好耐冇食既 pizza 做外賣，今晚打麻雀打得好開心，呀健唔知做乜成日都有笑料發生，食詐糊，整到 d 牌跌晒乜都有，坐佢順風車都可以漏左細佬起街上面都唔知，真係笑到我咳。

10月27日 (星期一)

今晚起屋企睇左集星期一檔案，講兩個患有絕症既人生活，每日都可能面對死亡，睇到人眼濕濕。

10月28日 (星期二)

睇住電視又口痕痕食左包卡樂 b，雖然好食但換黎既代價係暗瘡大爆發，重慘過燒一晚野食。

10月29日 (星期三)

打完波後有 d 頭痛，唔知係咪凍親。

10月30日 (星期四)

同事去左泰國玩，全公司得返 3 個人，加上冇乜野做，都幾悶。

10月31日 (星期五)

萬聖節正日，幫中心起荃灣一個私人住宅度攪左個萬聖節 party，未開始前已個個將自己化粧整到鬼五馬六，嚇死人咁。可能唔係太多人知既關係，參加者冇想像中咁多，得廿幾人，不過佢地都好有心思，有 d 小朋友已經化好粧著埋衫出席，冇既我地都有現場專人幫佢地攪，小朋友睇黎都幾開心，有 d 開頭唔敢化既後來都畫左個鬼樣，如果下年有機會真係想睇下蘭桂坊 d 洋人點樣扮鬼，一定好熱鬧。