9月1日 (星 期 三)

原 本 星 期 六 有 個 好 重 要 既 約 會，但 之 前 又 約 左 人 上 大 陸 玩，去唔到，可 惜。

9月2日 (星 期 四)

好 耐 冇 唱 過 k 喇，今 日 終 於 可 以 唱 返 夠 本，荃 灣 green box 115 蚊，包 兩 杯 野 飲，重 有 自 助 餐，d 歌 都 幾 新，算 係 咁。

9月3日 (星 期 五)

呢 排 好 耐 冇 聯 絡 既 朋 友 都 主 動 打 黎 搵 我，唔 知 重 乜。

9月4日 (星 期 六)

今 日 一 行 六 人 上 大 陸 玩，由 wendy 呢 個 大 陸 飲 食 專 家 帶 路，先 出 發 去 食 一 湘 菜 既 店 舖，由 於 去 到 果 陣 成 3 點 幾，成 間 餐 廳 得 我 地 一 抬 人，最 好 味 既 有 鴨 五 味，鴨 既 5 種 不 同 部 份，煎 炸 而 成，其 次 就 係 扣 肉，包 住 個 芋 頭，好 食 得 黎 又 唔 肥，好 正，其 他 小 菜 都 唔 錯，5 分 滿 分 俾 4 分 佢。之 後 就 落 東 門，今 日 周 末 好 多 人 起 度 行 街，女 仔去 買 衫shopping，男 仔 就 去 打 機，有 間 叫 法 拉 利 既 遊 戲 機 中 心，好 大 好 乾 淨，重 有 好 多 令 人 懷 念 既 game。跟 住 行 左 陣 百 貨 公 司，但 價 錢 同 香 港 賣 既 差 唔 多，最 後 冇 買。行 完 街 出 發 去 食 晚 飯，再 由 wendy 帶 路 落 到 深 圳 振 興 路，原 本 打 算 去 佢 推 介 既川 菜 舖 頭，去 到 佢 原 來 裝 修，唯 有 移 師 去 佢 對 面 間 酒 樓 幫 襯，叫 左 7 味 食 物，最 有 特 色 係 條 水 煮 魚，4 斤 重，而 且 都 幾 辣，食 到 個 咀 都 麻 痺 咁 滯。食 到 飽 飽 每 人 都 係 42 蚊。最 後 行 程 亦 係 全 日 焦 點，去 休 閑 中 心 按 摩 過 夜，落 到一 間 叫 東 方 夏 威 夷 既 地 方，門 口 平 平 無 奇，上 到 去 其 實 都 幾 豪 華，一 個 好 大 既 更 衣 同 沖 涼 既 地 方，重 有 桑 拿、浸 浴、刷 背 等，起 度 浸 住 都 可 以 過 左 兩 個 鐘 先 走，重 有 埋 牙 刷、剃 鬚 膏 等...連 紙 底 褲 都 有 埋，真 係 乜 都 唔 駛 帶 就 可 以 黎 呢 度 玩，而 且 重 有 娛 樂 設 施，電 腦、遊 戲 機、麻 雀、卓 球 等....雖 然 唔 係 好 多，但 都 叫 好 過 冇。沖 完 涼 就 做 腳 底 按 摩 同 埋 中 式 推 拿，完 晒 已 經 成 4 點 幾，做 做 下 就 慢 慢 訓 著 左............

9月5日 (星 期 日)

訓 到 朝 早 10 點 先 起 身，又 再 去 浴 室 沖 涼，焗 下 桑 拿，跟 住 埋 單 走，每 人 俾 埋 貼 士 200 蚊，都 算 幾 平。之 後 肥 健 話 去 飲 茶，呢 個 時 候 已 經 係 中 午，當 食 埋 LUNCH 先，未 食 早 餐 大 家 又 肚 餓，拿 拿 臨 係 咁 叫 野，咁 就 有 成 20 個 點 心 起 我 地 眼 前，一 路 上 一 路 食，都 幾 急，差 唔 多 碟 碟 都 清 晒 咁 滯，証 明 大 家 幾 肚 餓，呢 餐 係 咁 多 餐 最 貴，每 人 要 50 幾 蚊。食 飽 飽 行 落 書 城，勁 多 人，加 上 已 經 有 D 累，拎 左 本 書 都 搵 一 邊 坐 低 睇，本 書 係 村 上 春 樹，書 名 叫 羊 男 的 聖 誕 節，睇 完 既 結 論 係 ....不 願 置 評。起 度 企 左 成 兩 個 鐘，對 腳 真 係 頂 唔 順，一 出 書 城 我 同 菠 蘿 有 事 走 先，佢 地 其 他 人 食 埋 晚 飯 先 走，之 後 去 姑 媽 度 食 飯，表 姐 10 月 結 婚，到 時 又 要 去 飲 喇..... 今 晚 佢 地 整 左 條 老 虎 班，好 好 食，重 有 扇 貝 同 蝦，呢 兩 日 口 腹 不 淺。

9月6日 (星 期 一)

熱 死 人 喇~~~~~~~夜 晚 隻 貓 竟 然 熱 到 走 入 廁 所 訓。

9月7日 (星 期 二)

今 晚 睇 左 套 森 魔，想 睇 既 原 因 無 非 都 係 個 導 演 係 鬼 眼 果 個，睇 完 呢 套 戲 無 非 都 係 想 有 一 種 你 估 唔 到 個 結 局 係 咁 既 感 覺，呢 套 戲 雖 然 有，但 始 終 冇 鬼 眼 同 不 死 劫 咁 震 憾，而 且 個 故 仔 都 幾 簡 單，唔 係 太 幾 吸 引 人 去 追 落 去，整 體 黎 講 都 叫 中 規 中 矩。

9月8日 (星 期 三)

行 經 尖 沙 咀 海 港 城，見 到 IT 開 倉，可 能 今 日 係 第 一 日，好 多 人，不 過 入 面 賣 既 都 係 女 裝 多，鞋 同 衫 果 度 最 受 歡 迎，一 般 黎 講 都 有 23 折，男 裝 相 對 較 少，最 後 乜 都 買 唔 到，女 仔 黎 到 會 開 心 好 多。

9月9日 (星 期 四)

夜 晚 好 似 凍 左 咁，係 時 候 拎 返 張 被 出 黎 用。

9月10日 (星 期 五)

今 朝 原 本 工 作 都 唔 忙 碌，12 點 個 客 打 黎 又 話 呢 樣 急 果 樣 趕，又改 呢 樣又 改 果 樣，全 公 司 即 刻 進 入 混 亂 狀 態，lunch 都 係 食 半 個 鐘 就 拿 拿 臨 趕 返 黎 做 野，直 到 5 點，警 報 解 除，可 以 鬆 一 口 氣。

9月11日 (星 期 六)

呢 個 星 期 都 幾 忙，今 日 返 半 天 放 工 終 於 可 以 抖 抖。

9月12日 (星 期 日)

今 日 去 船 河，原 本 預 左 38 個 人 會 去，因 為 有 人 甩 底 或 其 他 原 因 黎 唔 到 既 關 係，最 後 只 有 32 人 出 席，朝 早 10 點 尖 沙 咀 出 發，架 船 都 幾 好，乾 淨 得 黎 又 幾 舒 服，多 人 既 話 走 得 都 冇 咁 辛 苦。由 於 預 算 有 限，都 冇 買 零 食 飲 品 果 d 上 去，不 過 後 來 先 發 現 好 多 人 都 冇 水 飲，橫 掂 都 係 買，順 便 買 多 d 汽 水 同 零 食，每 人 都 係 俾 多 少 少 錢，加 上 有 人 遲 到 既 關 係，再 落 船 買 野 返 黎 剛 剛 好。一 個 鐘 頭 左 右 船 程 落 到 去 南 豐 灣，都 泊 左 好 多 遊 艇 起 度，兩 個 灘 都 企 滿 人，book 左 架 快 艇 同 香 蕉 船 果 d，首 先 上 灘 打 下 沙 灘 波 同 掟 飛 碟，跟 住 返 上 船 食 野，但 d 食 物 麻 麻，好 多 都 咸 得 滯，最 後 食 剩 好 多，而 架 快 艇 又 有 一 個 鐘 頭 唔 知 走 左 去 邊 食 lunch，浪 費 左 好 多 時 間，雖 然 有 book 水 上 滑 板 但 唔 係 個 個 玩 到，呢 點 有 好 多 人 都 唔 係 好 滿 意。反 而 果 兩 位 船 家 就 唔 錯，人 品 幾 好，重 問 佢 拎 左 咭 片，下 次 再 搵 佢 地 幫 手。今 次 雖 然 有 唔 少 人 都 係 第 一 次 見，特 別 係 我 帶 黎 既 朋 友 佢 地 互 相 都 唔 認 識，好 彩 玩 起 上 黎 都 冇 乜 尷 尬 情 況，應 該 可 以 再 約 出 黎 玩。註：原 來 沙 灘 掟 飛 碟 係 一 樣 好 好 玩 既 遊 戲，今 日 完 全 感 受 到，有 10 個 人 以 上 係 最 正，基 本 上 全 日 最 開 心 就 係 玩 呢 個。

9月13日 (星 期 一)

遊 完 船 河，成 身 好 似 散 左 一 樣，今 日 呀 榮 生 日，祝 你 生 日 快 樂。

9月14日 (星 期 二)

幫 呀 欣 整 機，見 到 佢 新 買 既 兔 仔，名 叫 串 B，之 前 又 話 叫 美 齡，一 時 一 樣，但 隻 兔 好 有 性 格，點 都 唔 俾 人 抱，但 就 好 活 躍，成 日 走 黎 走 去，都 幾 趣 緻。

9月15日 (星 期 三)

唔 知 係 鼻 敏 感 定 係 傷 風，係 咁 流 鼻 水，要 抖 抖。

9月16日 (星 期 四)

返 工 期 間 收 到 電 話，外 公 今 朝 過 生，事 發 都 好 突 然，大 家 都 冇 乜 心 理 準 備，即 刻 請 假 去 醫 院 見 最 後 一 面，佢 生 前 擔 心 太 多 野，遺 容 都 有 少 少 唔 安 詳，人 唔 起 度，點 擔 心 都 冇 用。

9月17日 (星 期 五)

睇 左 套 異 獸 戰，本 身 鐘 意 既 兩 隻 怪 獸 碰 頭，但 睇 完 發 覺 冇 原 著 咁 吸 引，有 陣 時 睇 睇 下 都 覺 得 幾 攪 笑，而 且 套 片 唔 長，35 分 鐘，好 快 睇 完。

9月18日 (星 期 六)

原 來 面 部 按 摩 有 一 招 真 係 鍊 鼻，今 晚 我 感 受 到，而 且 亦 都 試 左 好 多 之 前 未 試 過 既 按 摩 手 法，確 係 勁。

9月19日 (星 期 日)

朝 早 大 陸 返 黎，無 端 端 個 天 又 落 雨，好 彩 唔 係 去 行 山，全 日 幫 人 整 機， 一 冇 野 做 就 起 度 食 野，兩 日 已 經 飲 左 4 杯 凍 檸 茶，兩 杯 咖 啡，因 為 咁 個 肚 又 少 少 唔 係 好 慣。

9月20日 (星 期 一)

玩 夠，休 息。

9月21日 (星 期 二)

夜 晚 行 雷 閃 電，重 有 旱 天 雷，之 後 落 大 雨，d 人 話 農 曆 8 月 例 牌 實 有。

9月22日 (星 期 三)

今 晚 打 羽 毛 球，竟 然 有 3 個 甩 底，好 在 有 預 多 人，最 後 6 個 剛 剛 好，而 且 最 近 上 網 book 場 都 越 黎 越 難，想 打 都 唔 易。

9月23日 (星 期 四)

呢 排 訓 覺 都 有 幾 聲 咳 同 流 鼻 水，又 唔 似 係 傷 風，應 該 都 係 鼻 敏 感 累 事

9月24日 (星 期 五)

同 朋 友 父 母 食 飯，俾 人 地 爸 爸 係 咁 罐 啤 酒 飲，攪 到 醉 醉 地。

9月25日 (星 期 六)

今 晚 中 心 童 軍 宣 誓 禮，做 既 野 同 舊 年 一 樣，唯 一 唔 同 既 係 多 左 班 小 童 軍，見 到 佢 地 真 係 好 細 過，得 5-8 歲，不 過 睇 落 都 幾 聽 話，由 3 點 鐘 入 去set 場，直 到 7 點 鐘 開 始。見 到 好 多 家 長 都 係 專 程 黎 棒 小 童 軍 場，佢 地 儀 式 一 完 當 堂 冇 左 7 成 人 企 起 度，到 幼 童 軍 方 面 亦 都 有 d 新 加 入，有 d 就 升 上 大 童 軍，話 咁 快 有 d 都 見 左 幾 年，想 唔 認 老 都 唔 得，儀 式 開 始 咁 耐 就 企 足 咁 耐，真 係 幾 鬼 腳 軟。

9月26日 (星 期 日)

難 得 可 以 訓 晏 d，今 日 10 點 起 身，下 午 出 左 旺 角，好 多 人，而 且 今 日 好 熱，都 幾 辛 苦，今 日 全 日 係 陪 人 買 野 多，先 達 有 間 賣 二 手 漫 畫 既 舖 頭 幾 好，介 紹 左 個 朋 友 去 買，一 套 三 十 一 本 既 漫 畫 都 係 賣 400 蚊，荃 灣 要 600，平 左 好 多，而 且 睇 過 入 面 都 幾 新，今 日 自 己 既 收 獲 係 買 左 本 漫 畫，屋 企 部 dvd 機 都 壞 左 好 耐，見 到 d 有 牌 子 既 都 係 賣 700 蚊 左 右，遲 d 真 係 要 買 返 部。

9月27日 (星 期 一)

聽 日 中 秋 節，原 本 諗 住 去 天 水 圍 果 個 bbq 場 玩，點 知 佢 竟 然 full 左，聽 晚 點 算 好 呢.....??

9月28日 (星 期 二)

中 秋 節 正 日，由 於 冇 得 bbq 既 關 係，今 年 過 得 好 普 通，先 去 佐 敦 食 杭 洲 野，呢 間 餐 廳 都 唔 錯，但 今 日 就 唔 算 好 多 人 幫 襯，可 能 好 多 人 都 返 屋 企 食 飯，食 飽 就 join 小 如 去 飲 野，由 佐 敦 行 去 旺 角 期 間，見 到 個 月 亮 好 圓 好 靚，跟 住 落 旺 角 去 開 間 pub 飲 野，一 樣 係 冇 乜 人，都 幾 靜，起 度 傾 偈 傾 左 一 陣 就 走，返 屋 企 途 中 就 見 到 d 小 朋 友 拎 住 個 燈 籠 起 街 玩，諗 返 起 細 過 果 陣 成 個 球 場 都 係 人，好 熱 鬧，而 家 連 點 枝 臘 燭 都 有 管 理 員 望 實，氣 氛 真 係 冇 以 前 咁 好。

9月29日 (星 期 三)

中 秋 節 假，今 日 幫 miko 佢 搬 屋，由 大 廈 搬 去 村 屋，要 搬 既 野 其 實 唔 多，但 就 好 寧 碎，用 左 兩 個 幾 鐘 頭 搬 晒 落 樓 下，搬 上 貨 車 15 分 鐘 左 右，再 落 貨 搬 上 佢 二 樓 既 村 屋，又 用 左 個 半 鐘，今 日 好 熱，而 且 佢 有 d 櫃 都 幾 重，尾 段 真 係 索 晒 氣，好 彩 有 佢 爸 爸 同 呀 哥 幫 手，之 後 miko 請 食 飯，落 左 去 ruby thursday，我 自 己 係 第 一 次 食，叫 左 5 樣 食 物，味 道 真 係 唔 錯，而 且 份 量 都 幾 大，特 別 係 果 個 超 級 漢 堡，非 常 大 個，重 有 把 刀 插 住 起 中 間，好 攪 笑，另 外 推 介 佢 個 薯 皮，一 樣 咁 正，起 今 晚 重 俾 我 發 現 到 miko 原 來 都 好 食 得，佢 講 左 句......出 黎 做 野 之 後 食 野 都 多 左，非 常 同 意，食 野 係 減 壓 既 其 中 一 個 方 法，而 且 佢 又 係 食 極 唔 肥 果 類，女 仔 應 該 好 羨 慕。

9月30日 (星 期 四)

呀 榮 話 起 旺 角 見 到 有 部 creative mp3 機，512mb 都 係 賣 980 蚊，真 係 好 抵，陪 佢 出 去 睇，但 好 多 間 都 冇 貨，要 下 星 期 先 有，心 諗 今 日 白 行，諗 走 前 上 去 樓 上 舖 間 友 誠 睇 一 睇，竟 然 發 現 有，即 刻 扑 搥 買 部，友 誠 賣 d 電 器 又 真 係 平 d，dvd 機 一 般 都 平 100 左 右，下 次 買 野 前都 係 上 黎 望 下 先。